Pokkiri Movie Celebrations – Ilaiya Thalapathy Doctor Vijay Speech

`போக்கிரி’ பட விழாவில் பேச்சு
“என்னை டாக்டர் விஜய் என்று அழைக்க வேண்டாம்”
ரசிகர்களிடம், விஜய் வேண்டுகோள்

சென்னை, ஆக.29-

“என்னை டாக்டர் விஜய் என்று அழைக்க வேண்டாம்” என்று `போக்கிரி’ பட விழாவில், ரசிகர்களிடம் நடிகர் விஜய் கேட்டுக்கொண்டார்.

`போக்கிரி’ பட விழா

விஜய் நடித்த `போக்கிரி’ படத்தின் 126-வது நாள் வெற்றி விழா, சென்னை அமைந்தகரை லட்சுமி தியேட்டரில் நேற்று இரவு நடந்தது. இந்த விழாவில் விஜய் கலந்துகொண்டார்.

வாணவேடிக்கையுடன் பட்டாசுகள் வெடித்து விஜய்யை, ரசிகர்கள் வரவேற்றனர். ரசிகர்கள் மத்தியில் விஜய் பேசினார். அவர் பேசியதாவது:-

“நீங்கள் எல்லோரும் என்னை இளையதளபதி விஜய் என்று மட்டும் அழைத்தால் போதும். டாக்டர் விஜய் என்று அழைத்தால் பயமாக இருக்கிறது. வேறு யாரையோ கூப்பிடுகிற மாதிரி இருக்கிறது.

இந்த படம், `ஷிப்ட்டிங்’கில் 125 நாட்களை தாண்டி ஓடியிருப்பது சந்தோஷமாக இருக்கிறது. தியேட்டரில் வேலை செய்த அத்தனை பேருக்கும் நன்றி தெரிவித்துக்கொள்கிறேன்.”

இவ்வாறு விஜய் பேசினார்.

பாட்டு பாடினார்

அவர் பேசி முடித்ததும், “ரசிகர்களுக்காக, விஜய் ஒரு பாட்டு பாடுவார்” என்று மக்கள் தொடர்பாளர் செல்வகுமார் மேடையில் அறிவித்தார். உடனே விஜய் எழுந்து வந்து, “ஆடுங்கடா என்னை சுத்தி…அய்யனாரு வெட்டுக்கத்தி” என்ற பாடலை பாடினார்.

அதைக்கேட்டு, ரசிகர்கள் கைதட்டியும், விசில் அடித்தும் ஆரவாரம் செய்தார்கள்.

ராம.நாராயணன்

விழாவுக்கு தமிழ் திரைப்பட தயாரிப்பாளர்கள் சங்க தலைவர் ராம.நாராயணன் தலைமை தாங்கி பேசினார். அவர் பேசும்போது, “விஜய், எம்.ஜி.ஆர். விட்டுசென்ற இடத்தை மிக விரைவில் பிடிப்பார்” என்றார்.

திரைப்பட வினியோகஸ்தர்கள் சங்க தலைவர் கலைப்புலி ஜி.சேகரன் பேசும்போது, “சில நடிகர்களுக்கு பெயரும், புகழும் வந்ததும், அவர்களின் நடை-உடை-பாவனைகள் மாறும். ஆனால் விஜய் இன்னும் எளிமையாகவே காணப்படுகிறார்” என்றார்.

அண்ணாநகர் சரக காவல்துறை உதவி ஆணையாளர் ராமதாஸ், `போக்கிரி’ படத்தின் தயாரிப்பாளர் ரமேஷ்பாபு, விஜய்யின் தந்தையும், டைரக்டருமான எஸ்.ஏ.சந்திரசேகரன், தியேட்டர் அதிபர் ஸ்ரீகாந்த் ஆகியோரும் விஜய்யை வாழ்த்தி பேசினார்கள்.

வினியோகஸ்தர் கலைப்பூங்கா ராவணன், பிரபு ராம்பிரசாத் ஆகிய இருவரும் அனைவரையும் வரவேற்று பேசினார்கள்.

‘Desamuduru’ hero Allu Arjun gets robbed by fans

ரசிகர்கள் போல் முற்றுகை: நடிகரின் நகைகளை பறித்த திருடர்கள்

நகரி, பிப். 11-

தெலுங்கு திரையுலகின் முன்னணி நடிகராக இருப்பவர் அல்லு அர்ஜுன். இவர் நடிகர் சிரஞ்சீவியின் மைத்துனர் மகன். அல்லு அர்ஜுன் நடித்த “தேச முதுரு” படம் 100 நாட்களைத் தாண்டி அபார வெற்றி பெற்றுள்ளது. இப்படத்தில் அல்லு அர்ஜுன் அநியாயங்களைச் தட்டிக் கேட்பவராக நடித்திருக்கிறார்.

இப் படத்தின் வெற்றி விழா குண்டூரில் உள்ள `ராஜ் சென்டர்’ அரங்கத்தில் நடந்தது. இவ்விழாவில் அவரது ரசிகர்கள் ஏராளமானோர் கலந்து கொண்டனர். விழா முடிந்ததும் அவருடன் கைகுலுக்க ரசிகர்கள் முண்டியடித்தனர். இதை தங்களுக்கு சாதகமாகப் பயன்படுத்திக் கொண்ட திருட்டுக் கும்பல் ஒன்று அல்லு அர்ஜுனை ரசிகர்கள் போல சூழ்ந்து கொண்டது.

தன்னைச் சுற்றி நின்று கொண்டிருப்பது திருடர்கள் என்பதை அறியாத அர்ஜுன் அவர்களுடன் கை குலுக்கினார்.

அப்போது திருடர்கள், `அல்லு அர்ஜுன் வாழ்க’ என்று கோஷமிட்டனர். பின்னர் அவரை கட்டிபிடித்து வாழ்த்துவது போல நடித்து அவர் கழுத்தில் அணிந்திருந்த பெரிய தங்க செயின், கையில் அணிந்திருந்த பிரேஸ்லெட், வைர மோதிரம், தங்க கடிகாரம், செல்போன், பேண்ட் பாக்கெட்டில் வைத்திருந்த மணிபர்ஸ்.. என்று ஒவ்வொன்றாகப் பறித்தனர்.

பின்னர் கூட்டத்தோடு கூட்டமாக திருடர்கள் நைசாக தப்பி ஓடிவிட்டனர்.

பொது நிகழ்ச்சி ஒன்றில் திருடர்களிடம் அத்தனை நகைகளையும், பணத்தையும் இழந்ததால் அல்லு அர்ஜுன் மிகுந்த வேதனை அடைந்தார்.

அவர் கூறும்போது `ரசிகர்கள்தான் என்னை கட்டிப்பிடித்து வாழ்த்து தெரிவிப்பதாக நினைத்தேன். திருடர்கள் இந்த அளவுக்கு துணிச்சலுடன் பொது நிகழ்ச்சிலேயே எனது அத்தனை நகைகளையும் பறித்து சென்றது வேதனையாக உள்ளது. இனி நடிகர்கள், ரசிகர்கள் கும்பலாக வந்தால் எச்சரிக்கையுடன் இருப்பது நல்லது’ என்றார்.

இதே விழாவில் பலரது செல்போன்களும், நகைகளும் திருட்டு போனது. இது பற்றி குண்டூர் போலீசில் புகார் செய்யப்பட்டுள்ளது. போலீசார் வழக்குப் பதிவு செய்து திருட்டு கும்பலை தேடிவருகிறார்கள்.

Na Muthukumar pens the opening song for Rajinikanth in Sivaji (The Boss)

கவிஞருக்கு வசன “கிரீடம்’!

அஜீத் நடிக்கும் “கிரீடம்’ படத்தின் மூலம் வசனகர்த்தா ஆகியுள்ளார் பாடலாசிரியர் நா.முத்துக்குமார். இயக்குநர் ஆகும் ஆசையில் பாலுமகேந்திராவிடம் நான்கு வருடங்கள் உதவியாளராகப் பணியாற்றியவர். இவருடைய பாடல்களுக்கு சிறப்பான வரவேற்பு கிடைக்கவே பாடலாசிரியராக நிலைத்துவிட்டார். சமீபத்தில் தன்னுடைய ஆராய்ச்சிக் கட்டுரைக்காக முனைவர் பட்டம் பெற்ற முத்துக்குமார், கடந்த வருடம் அதிக பாடல்கள் எழுதிய சினிமா பாடலாசிரியர்கள் வரிசையில் முதலிடத்தில் உள்ளார்.

அவர் பணியாற்றிய 34 படங்களில் 96 பாடல்கள் எழுதியிருக்கிறார். இவற்றில் 14 படங்களில் அனைத்துப் பாடல்களையும் எழுதியிருக்கிறார். தற்போது

• “சிவாஜி’,
• “போக்கிரி’,
• “பீமா’,
• “தீபாவளி’,
• “தமிழ் எம்.ஏ.’ உள்பட நாற்பதுக்கும் மேற்பட்ட படங்களுக்கு பாடல்கள் எழுதி வருகிறார். இவற்றுள் ஏ.ஆர்.ரஹ்மான் இசையில் அடுத்த வருடம் மூலை முடுக்கெல்லாம் ஒலிக்கப்போகும் ஒரு முக்கியப் பாடலும் அடக்கம். அது “சிவாஜி’ படத்தில் ரஜினிகாந்தின் அறிமுகப் பாடல்!

Pokkiri Movie Release may be delayed for Pongal – Vijay movies will not be screened

விஜய் படங்களுக்கு இனி ஒத்துழைப்பு இல்லை: திரையரங்கு உரிமையாளர்கள் முடிவு

சென்னை, டிச.25: “ஆதி‘ திரைப்படத்தால் ஏற்பட்ட நஷ்டத்தை ஈடுகட்டும் வரையில் நடிகர் விஜய் மற்றும் எஸ்.ஏ.சந்திரசேகர் ஆகியோரின் படங்களுக்கு ஒத்துழைப்பு கொடுப்பதில்லை என தமிழ்நாடு திரையரங்கு உரிமையாளர்கள் சங்கம் தீர்மானம் நிறைவேற்றியுள்ளது.

இச்சங்கத்தின் வருடாந்திர பொதுக்குழு கூட்டம் சென்னையில் உள்ள தென்னிந்திய திரைப்பட வர்த்தக சபை அரங்கில் சனிக்கிழமை நடைபெற்றது. கூட்டத்தில் நிறைவேற்றப்பட்ட தீர்மானங்கள்:

தமிழக அரசு அறிவித்துள்ள திரையரங்குகளுக்கான புதிய நுழைவுக் கட்டணத்தை முழு மனதோடு ஏற்றுக்கொள்வது.

திரைப்படங்களின் பட்ஜெட்டுக்கு ஏற்றவாறு அரசு அனுமதித்துள்ள நுழைவுக் கட்டணத்திற்கு உள்பட்டு நுழைவுக் கட்டணத்தை அவ்வப்போது மாற்றி அமைத்துக்கொள்ள அரசை கோருவது.

விஜய் நடித்த “ஆதி’ படத்தால் ஏற்பட்ட நஷ்டம் தொடர்பாக தயாரிப்பாளர் எஸ்.ஏ.சந்திரசேகருடன் நடத்திய பேச்சுவார்த்தையில் சுமுகமான முடிவு கிடைக்கவில்லை. எனவே எஸ்.ஏ.சந்திரசேகருக்கும், நடிகர் விஜய்க்கும் தொழில்முறையில் ஒத்துழைப்பு கொடுப்பதில்லை என முடிவு.

இனி வரும் காலங்களில் விநியோகஸ்தர்களுக்கு எம்.ஜி. மற்றும் எஃப்.எச். கொடுப்பதில்லை. மேலும் பெரிய பட்ஜெட் படங்களுக்கு 60 சதவிகிதமும், சிறு பட்ஜெட் படங்களுக்கு 50 முதல் 55 சதவிகிதம் வரையிலும் சதவிகித அடிப்படையில் படங்களைத் திரையிடுவது என்றும் தீர்மானங்கள் ஏகமனதாக நிறைவேற்றப்பட்டன.

Asin gets hurt in Vijay’s Pokkiri song picturization by Prabhu Deva

படப்பிடிப்பில் அஸின் காயம்

சென்னை, டிச.8: “போக்கிரி‘ படத்தில் இடம்பெறும் ஒரு நடனக் காட்சிக்கான படப்பிடிப்பின்போது நடிகை அஸினுக்கு காயம் ஏற்பட்டது.

நடிகர் விஜய், அஸின் நடித்து வரும் “போக்கிரி’ படத்தின் படப்பிடிப்பு ஏவி.எம். ஸ்டுடியோவில் நடைபெற்று வருகிறது. இப்படத்தின் ஒரு பாடல் காட்சி புதன்கிழமை படமாக்கப்பட்டது.

பட இயக்குநர் பிரபுதேவா நடன அசைவுகளைப் பற்றி விஜய், அஸின் ஆகியோருக்கு விளக்கி படமாக்கிக்கொண்டிருந்தார். அப்போது அஸினிடம் “ஷூவை கழற்றிவிட்டு நடனமாடினால் காட்சி இன்னும் சிறப்பாக வரும்’ என்று கூறியுள்ளார்.

இதனால் பலகைகளால் உருவாக்கப்பட்டிருந்த அந்த மேடையில் அஸின் வெறும் காலுடன் ஆடியுள்ளார். அப்போது பலகையில் இருந்த ஓர் ஆணி அஸின் பாதத்தில் பாய்ந்து ரத்தம் வழிந்துள்ளது.

உடனே அவருக்கு அவசர சிகிச்சை அளிக்கப்பட்டது. மூன்று நாள்கள் ஓய்வுக்குப் பின் மீண்டும் படப்பிடிப்பில் கலந்துகொள்வார் என படக்குழுவினர் தெரிவித்தனர்.