Tamil News

BBC, Dinamani, Dinamalar, Maalai Malar et al

Archive for the ‘Ninth Schedule’ Category

SC flays legislature for misuse of Ninth Schedule

Posted by Snapjudge மேல் ஜனவரி 16, 2007

முக்கிய தீர்ப்புகள்

உச்ச நீதிமன்றம் கடந்த 3 நாள்களில் அடுத்தடுத்து 2 முக்கியமான தீர்ப்புகளை அளித்துள்ளது. அவை- நாடாளுமன்ற மற்றும் சட்டமன்றங்களின் அதிகாரங்கள் தொடர்புடையவை.

இவற்றில் அரசியல் சட்டத்தின் 9-வது அட்டவணை தொடர்பான தீர்ப்பு அதிக முக்கியத்துவம் வாய்ந்ததாகக் கருதப்படுகிறது. சட்டத் திருத்தங்களை நிறைவேற்றி அதை 9-வது அட்டவணையில் சேர்ப்பதை எதிர்த்து தாக்கல் செய்யப்பட்ட பொது நல வழக்கை விசாரித்த தலைமை நீதிபதி ஒய்.கே. சபர்வால் தலைமையிலான 9 நீதிபதிகள் கொண்ட அரசியல் சட்ட பெஞ்ச், அரசியல் சட்டத்தின் 9- வது அட்டவணையில் சேர்க்கப்படும் சட்டங்கள் அரசியல் சட்டத்தின் அடிப்படை அமைப்பைத் தகர்ப்பதாக இருந்தால், அவை நீதிமன்றத்தின் ஆய்வுக்கு உட்பட்டவையே என்று தீர்ப்பு வழங்கியுள்ளது.

அரசியல் சட்டத்தின் 14,19,20 மற்றும் 21- வது பிரிவுகளில் மக்களின் அடிப்படை உரிமைகளுக்கு உத்தரவாதம் அளிக்கப்பட்டுள்ளது. இவற்றை மீறும் வகையிலான சட்டங்கள் 9-வது அட்டவணையில் சேர்க்கப்பட்டுள்ளதால் அவற்றை நீதிமன்றம் விசாரிக்க முடியும் என்றும் தீர்ப்பில் தெரிவிக்கப்பட்டுள்ளது.

ஜவாஹர்லால் நேரு பிரதமராக இருந்தபோது 1951ல் இந்திய அரசியல் சட்டத்தில் ஒரு முக்கியச் சட்டத்திருத்தம் கொண்டுவரப்பட்டு 9-வது அட்டவணை என்ற பிரிவு உருவாக்கப்பட்டது. சில சட்டங்கள், குறிப்பாக ஜமீன்தாரி முறை நீக்கப்பட்ட பிறகு நிலச் சீர்திருத்தச் சட்டங்கள், நீதிமன்ற பரிசீலனைக்கு அப்பாற்பட்டவையாக இருக்க வேண்டும் என்று கருதி இந்த ஏற்பாடு செய்யப்பட்டது. இதுவரை இந்த அட்டவணையில் 284 சட்டங்கள் சேர்க்கப்பட்டுள்ளன. இதில் 30 சட்டங்களை எதிர்த்து தாக்கல் செய்யப்பட்ட வழக்குகள் நீதிமன்றங்களின் பரிசீலனையில் உள்ளன.

1974க்குப் பிறகு 9-வது அட்டவணையில் சேர்க்கப்பட்ட சட்டங்களை எதிர்த்து வழக்கு தொடர்ந்தால் அதைப் பரிசீலிக்க 3 நீதிபதிகள் கொண்ட பெஞ்ச் அமைக்கப்படும் என்றும் தீர்ப்பில் தெரிவிக்கப்பட்டுள்ளது.

9-வது அட்டவணையில் இடம் பெறும் சட்டங்கள், மக்களின் அடிப்படை உரிமைகளைப் பாதிப்பதாக இருந்தாலும் கூட அவற்றை விசாரிக்கவோ, பரிசீலிக்கவோ நீதிமன்றங்களுக்கு அதிகாரம் இல்லை என்பதுதான் அட்டவணையின் குறிப்பிடத்தக்க அம்சம். இந்த அட்டவணையில் சேர்க்கப்பட்ட அனைத்து சட்டங்களுக்கும் அரசியல் சட்டத்தின் 31-பி பிரிவு ஒட்டுமொத்தமாக ஆய்வுக்கு உட்படாத பாதுகாப்பு அளிக்கிறது. தற்போதைய தீர்ப்பின் மூலம் இந்த நிலைமை மாற்றி அமைக்கப்பட்டுள்ளது.

தமிழகத்தில் கல்வி மற்றும் வேலைவாய்ப்புகளில் 69 சதவீத இட ஒதுக்கீடு அளிக்க வகை செய்யும் சட்டத்திருத்தமும் இந்த அட்டவணையில் சேர்க்கப்பட்டுள்ளது. இட ஒதுக்கீடு 50 சதவீதத்துக்கும் அதிகமாக இருக்கக்கூடாது என்று உச்ச நீதிமன்றம் உத்தரவிட்டுள்ளது. இதற்கு அப்பாற்பட்டுத்தான் தமிழக அரசு சட்டத்திருத்தம் கொண்டு வந்து, 9- வது அட்டவணையில் அது சேர்க்கப்பட்டது.

இட ஒதுக்கீட்டுச் சட்டத்தை முழுமையாக ஆய்வு செய்து முடிவு தெரிவிக்க 3 நீதிபதிகள் கொண்ட குழு அமைக்கப்படும் என்று உச்ச நீதிமன்றம் தெரிவித்துள்ளது. குழுவின் ஆய்வை பரிசீலனை செய்த பிறகு உச்ச நீதிமன்றம் தனது முடிவை அறிவிக்கும்.

மற்றொன்று நாடாளுமன்றத்தில் கேள்வி கேட்க லஞ்சம் வாங்கியதாக நாடாளுமன்ற உறுப்பினர்கள் 12 பேரை பதவி நீக்கம் செய்ய நாடாளுமன்றம் எடுத்த முடிவு சரியானதுதான் என்று 5 நீதிபதிகள் அடங்கிய அரசியல் சட்ட பெஞ்ச் புதன்கிழமை தீர்ப்பு அளித்தது.

எத்தகைய சட்டத் திருத்தங்கள் செய்தாலும் பல்வேறு அம்சங்களையும் ஆழ்ந்து பரிசீலிக்க வேண்டும் என்பதையே இந்தத் தீர்ப்புகள் உணர்த்துகின்றன.

Posted in 9th Schedule, Article 31B, Constitution Bench, constitutional amendment, Fundamental Rights, IX Schedule, Jawaharlal Nehru, Kesavananda Bharati, Law, Ninth Schedule, Order, Supreme Court, Supreme Court of India, YK Sabharwal | Leave a Comment »

Inclusion of the Tamil Nadu Reservation Act in the IX Schedule is unconstitutional: KM VIjayan

Posted by Snapjudge மேல் நவம்பர் 1, 2006

தமிழக இடஒதுக்கீடு சட்டத்தை 9-வது அட்டவணையில் சேர்த்தது சட்டவிரோதம்: உச்சநீதிமன்றத்தில் வழக்கறிஞர் விஜயன் வாதம்

புதுதில்லி, நவ. 1: தமிழக இட ஒதுக்கீடு சட்டத்தை, நீதிமன்ற ஆய்வுக்கு உட்படுத்தாத வகையில், அரசியல் சட்டத்தின் 9-வது அட்டவணையில் சேர்த்தது சட்டவிரோதம் என்று உச்சநீதிமன்ற 9 நீதிபதிகள் கொண்ட பெஞ்ச் முன்பு வாதிட்டார் மூத்த வழக்கறிஞர் கே.எம். விஜயன்.

சட்டங்களை இயற்றி அவற்றை 9-வது அட்டவணையில் சேர்க்க நாடாளுமன்றத்துக்கு உள்ள அதிகாரங்கள் குறித்து உச்சநீதிமன்ற தலைமை நீதிபதி ஒய்.கே. சபர்வால் தலைமையிலான 9 நீதிபதிகள் பெஞ்ச், திங்கள்கிழமை முதல் விசாரித்து வருகிறது. தமிழ்நாடு இட ஒதுக்கீடு சட்டம் உள்பட பல்வேறு மாநில சட்டங்களை இதில் சேர்த்தது குறித்தும் நீதிமன்றம் விசாரிக்க உள்ளது.

ஒரு சட்டம் இயற்றப்பட்டு, அதை 9-வது அட்டவணையில் சேர்த்து விட்டால், அது நீதிமன்ற ஆய்வுக்கு அப்பாற்பட்டது என்ற பாதுகாப்பைப் பெற்று விடுகிறது.

மூத்த வழக்கறிஞர் ஃபாலி நாரிமனை அடுத்து, “வாய்ஸ்’ என்ற நுகர்வோர் அமைப்பின் சார்பில் செவ்வாய்க்கிழமை வாதிட்ட விஜயன், கேசவானந்த் பாரதி வழக்கில் 1973-ம் ஆண்டு நீதிமன்றத்துக்குப் பிறகு தமிழ்நாடு இட ஒதுக்கீடு சட்டம் 1994-ம் ஆண்டு 9-வது அட்டவணையில் சேர்க்கப்பட்டதால், அது நீதிமன்ற ஆய்வுக்கு அப்பாற்பட்டதாக இருக்க முடியாது என்றார்.

அரசியல் சட்டத்தின் பிரிவு 31 (ஏ)-ன் கீழ் நிறைவேற்றப்பட்ட சட்டங்களைத் தவிர, மற்ற சட்டங்களை 9-வது அட்டவணையில் சேர்க்க முடியாது. ஆனால், தமிழக இட ஒதுக்கீடு சட்டம் 31 (ஏ)-வின் கீழ் நிறைவேற்றப்படவில்லை என்று அவர் குறிப்பிட்டார்.

எழுத்து மூலம் நீதிமன்றத்தில் அளித்த மனுவில், 9-வது அட்டவணை தவறாகப் புரிந்து கொள்ளப்பட்டிருப்பதாகக் கூறியுள்ளார். 94 சதம் மக்கள் இட ஒதுக்கீடு பிரிவைச் சேர்ந்தவர்கள் என்று அறிவித்துவிட்ட பிறகு, இட ஒதுக்கீடு அர்த்தமற்றதாகிவிட்டது. தமிழக இட ஒதுக்கீடு சட்டம், அரசியல் சட்டத்துக்கு முரணானது என்றும், அதை அமல்படுத்த அனுமதிக்கக் கூடாது என்றும் குறிப்பிட்டுள்ளார்.

Posted in Constitution, Fali Nariman, fraud, Harish Salve, judicial review, Keshavanand Bharti, KM Vijayan, Ninth Schedule, Reservation Act, Supreme Court, Tamil Nadu, Voice | 1 Comment »