Indian campaign ends in Olympic qualifiers

கொரியாவிடம் இந்தியா மீண்டும் தோல்வி

சென்னை, பிப். 26: ஒலிம்பிக் போட்டியில் இடம்பெறுவதற்கான தகுதி கால்பந்துப் போட்டியில் இந்திய மகளர் அணியை 3-0 என்ற கோல் கணக்கில் தோற்கடித்தது கொரிய அணி.

சென்னை நேரு ஸ்டேடியத்தில் ஞாயிற்றுக்கிழமை மாலை இப் போட்டி நடைபெற்றது.

ஆட்டம் தொடங்கியதிலிருந்து இரு அணிகளும் கோல் அடிக்க கடும் போராட்டம் நடத்தின. இந்த போராட்டத்தில் கொரிய மகளிர் முந்தினர். 25-வது நிமிஷத்தில் லீ கீ அபாரமாக கோல் அடித்து கொரியாவை முன்னிலைப்படுத்தினார்.

அதன் பின் இந்திய மகளிர் அணி கோல் அடிக்க கடும் முயற்சி மேற்கொண்டனர், அந்த முயற்சியை கொரிய மகளிர் தகர்த்தெறிந்தனர்.

38-வது நிமிஷத்தில் பார்க் ஹீ யங்கும், 39-வது நிமிஷத்தில் மூன் சுலே ஆகியோரும் அடுத்தடுத்து கோல் அடித்து, கொரியாவை வலுப்படுத்தினர்.

பிற்பாதியில் இந்திய அணியினர் நிறைய தவறுகள் செய்தனர். இதனால் கிடைத்த வாய்ப்புகள் பறிபோயின.

முடிவில் 3-0 என்ற கணக்கில் இந்தியவை வென்றது கொரியா.

தென் கொரியாவின் மாசானில் கடந்த மாதம் 17-ம் தேதி நடந்த போட்டியில் இந்தியாவை 5-0 என கொரியா தோற்கடித்தது குறிப்பிடத்தக்கது.

Doha Asiad ’06 – India’s Medal Tally improves by 19

இந்தியாவுக்கு கடந்த போட்டியை விட 19 பதக்கங்கள் அதிகம்

டோகா, டிச. 16-

டோகா நகரில் நடந்து வந்த ஆசிய விளையாட்டுப் போட்டி நேற்றுடன் முடிவடைந்தது. இதில் 165 தங்கம் உள்பட 316 பதக்கங்களை பெற்று சீனா முதலிடத்தை பிடித்துள்ளது. 58 தங்கம் உள்பட 193 பதக்கங்களுடன் தென் கொரியா 2-வது இடத்தையும், 50 தங்கம் உள்பட 198 பதக்கங்களுடன் ஜப்பான் 3-வது இடத்தையும் பிடித்துள்ளது.

இந்தியாவுக்கு 8-வது இடம் கிடைத்து உள்ளது. 10 தங்கம், 18 வெள்ளி, 26 வெண்கலம் என மொத்தம் 54 பதக்கங்கள் கிடைத்து உள்ளன.

2002-ம் ஆண்டு நடந்த ஆசிய விளையாட்டு போட்டியில் இந்தியாவுக்கு 10 தங்கம் உள்பட 35 பதக்கம் கிடைத்து இருந்தன. இந்த போட்டியல் கூடுதலாக 19 பதக்கங்கள் இந்தியாவுக்கு கிடைத்து உள்ளன.

இருந்தாலும் தர வரிசை அடிப்படையில் எந்த முன்னேற்றமும் இல்லை. கடந்த போட்டியிலும் 8-வது இடத்தைதான் பிடித்தது. இந்த தடவையும் அதே இடம்தான் கிடைத்து உள்ளது.

1998-ம் ஆண்டு போட்டியில் இந்தியா 7 தங்கம் உள்பட 35 பதக்கம் பெற்றிருந்தது. அப்போது 9-வது இடத்தில் இருந்தது.