Turkey seeks OK for military move into northern Iraq

குர்து பிரிவினைவாதிகள் மீது எல்லை கடந்து தாக்க துருக்கிய நாடாளுமன்றம் அங்கீகாரம்

வட இராக்கில் குர்து இன பிரிவினைவாதிகளின் தளங்களின் மீது எல்லை கடந்த தாக்குதல்களை நடத்த, துருக்கிய இராணுவத்துக்கு அனுமதி அளித்து, துருக்கிய நாடாளுமன்றம் பெரும் ஆதரவுடன் வாக்கெடுப்பு ஒன்றை நிறைவேற்றியுள்ளது.

இந்த தாக்குதல்களை ஓராண்டு காலம் நடத்த அரசுக்கு அனுமதி அளிக்கும் தீர்மானம் ஒன்றை, 550 நாடாளுமன்ற உறுப்பினர்களில் 19 பேர் மட்டுமே எதிர்த்து வாக்களித்தனர்.

துருக்கிய பிரதமர் ரசெப் தயிப் எர்தோவான், இராக்குக்குள் ஊடுருவல்கள் என்பது உடனடியாக நடக்கப்போவதில்லை என்று கூறினார். ஆனால் குர்துகளின் பிராந்திய அரசோ, இந்த ஆமோதிக்கும் வாக்கெடுப்பு சர்வதேச சட்டத்தை மீறியதாகும் என்று கூறியது.

இந்த முடிவு அறிவிக்கப்படும்போது, அமெரிக்க அதிபர் புஷ், துருக்கியை பெரிய எல்லைகடந்த ஊடுருவல் எதையும் தொடங்கவேண்டாம் என்று வலியுறுத்தினார்.

அத்தகைய தாக்குதல் எதுவும், துருக்கியின் நலன்களுக்கு உகந்தது அல்ல என்றும் அவர் கூறினார்.

துருக்கிய நாடாளுமன்றத்தின் இந்த நடவடிக்கை, ஒரு புதிய இராஜிய முயற்சிகளை தூண்டியுள்ளது. இந்த இராஜதந்திர முயற்சிகள் எடுக்கப்படவேண்டும் என்பதுதான் ஒருவேளை இந்த நடவடிக்கையின் பின்னுள்ள பிரதானமான நோக்கமாக இருக்கலாம்.

ஆனால், இராக்கின் வடக்கே உள்ள, பெரும்பாலும் சுயாட்சி பெற்ற குர்திஷ் பகுதியில் இராக்கின் மத்திய அரசுக்கு பெருமளவு செல்வாக்கு, அதிகாரம் இல்லை என்பது துருக்கிக்கு தெரிந்ததுதான்.

உடனடியாக ஏதும் போர் நடவடிக்கை எடுக்கப்படும் என்ற சாத்தியக்கூறு பெருமளவு இல்லை என்று துருக்கிய பிரதமர் ரெசெப் தயிப் எர்தோவான் கூறியுள்ளார்.

பெரிய அளவில் ஏதும் ஆயத்த நடவடிக்கைகள் எடுக்கப்படுவதாக வெளிப்படையாகத் தெரியவில்லை என்றுதான் மேலை நாடுகளின் இராணுவ வட்டாரங்களும் கூறுகின்றன.

ஆனால் அத்தகைய நடவடிக்கை எடுக்கப்பட்டால் அதற்கு துருக்கியில் பெருத்த மக்கள் ஆதரவு இருக்கும். எந்தவொரு தாக்குதலுக்கும் குறிப்பிடத் தகுந்த பின்விளைவுகளும் இருக்கும் என்பது நிச்சயம்.

	இராக்கிய எல்லைக்கு அருகே துருக்கிய காவலரண்

துருக்கிய இராணுவம் சிறிய தாக்குதல்களை அல்லது வெறும் விமானத் தாக்குதல்களை மட்டும் நடத்துவது என்பதோடு நிறுத்திக் கொண்டால்,அதற்கு சிறிய பின்விளைவுகள்தான் இருக்கும்.

ஆனால் அவைகளில் கூட ஆபத்துக்கள் இருக்கின்றன.

கிர்க்குக் நகருக்கு அல்லது அருகில் உள்ள எண்ணெய்க் கிணறுகளுக்கு அச்சுறுத்தல்களை விளைவிப்பது போன்ற எந்த ஒரு நடவடிக்கையும் ஒரு பெரிய நெருக்கடியை தோற்றுவித்து, இராக்கிய படைகளையோ, அமெரிக்காவையோ அல்லது இரானையோகூட மோதலில் ஈடுபடுத்திவிடக்கூடும்

கவலையில் அமெரிக்கா

	அதிபர் புஷ்

நிச்சயமாக அமெரிக்கா கவலையில் இருக்கிறது. இராக்கில் இதற்கு மேலும் இராணுவ சவால்களை சந்திக்க அதற்கு வசதிகள் இல்லை.

மேலும்,அங்கு அது இருப்பதற்கே, துருக்கியின் ஆதரவு அமெரிக்காவுக்கு பெருமளவில் தேவைப்படுகிறது.

மேலும், முதலாம் உலகப்போர் காலத்தில் துருக்கியில் ஆர்மீனியர்கள் பெருமளவில் கொல்லப்பட்டது ஒரு இனப்படுகொலை என்று கண்டனம் செய்து, அமெரிக்க காங்கிரஸ் கமிட்டி ஒன்று வாக்களித்த விவகாரம் தொடர்பாக, ஏற்கனவே, அமெரிக்க-துருக்கி உறவுகள் ஒரு சிக்கலான கட்டத்தில் உள்ளன.

அமெரிக்காவுக்கும் துருக்கிக்கும் இடையேயான உறவுகளில் விரிசல் ஏற்படும் ஆபத்தை உணர்ந்தோ என்னவோ, அமெரிக்க காங்கிரசில், இந்த பிரேரணைக்கு ஆதரவு குறைந்து வருவது போல் தோன்றுகிறது.

குழப்பத்தில் இருக்கும் ஒரு பிரதேசத்தில் தங்களை நிலை நிறுத்திக்கொள்ள முயலும் துருக்கியின் ஆட்சியாளர்களுக்கு, இவை எல்லாம் ஒரு சிக்கல் நிறைந்த கணக்குகள்தான்.

---

Turkey’s Orhan Pamuk wins Nobel literature prize

துருக்கிய எழுத்தாளருக்கு இலக்கியத்துக்கான நோபல் பரிசு

	நோபல் பரிசு பெற்ற துருக்கிய எழுத்தாளர்

இந்த ஆண்டு இலக்கியத்திற்கான நோபல் பரிசு துருக்கியைச் சேர்ந்த ஓர்ஹான் பகுக்கிற்கு வழங்கப்பட்டுள்ளது.

கடந்த ஆண்டு ஆர்மேனிய மக்களின் படுகொலைகளை எழுப்பியதற்காக கடந்த ஆண்டு இவர் மீது வழக்கு தொடுக்கப்பட்டது.

அவரது சொந்த நகரமான இஸ்தான்புல்லில் உள்ள பல்வேறு கலாச்சரங்களிடையேயான மோதல்களையும் அவை எவ்வாறு பின்னிப் பிணைந்துள்ளன என்பதையும் மிகத் சிறப்பாக வெளிக்கொண்டுவந்த அவரது திறமையை சுவீடிஷ் அகாடமி பாராட்டியுள்ளது.

இந்த பரிசளிப்பிற்கு ஒரு திடமான அரசியல் எதிரொலி இருப்பதாக பிபிசியின் செய்தியாளர் தெரிவிக்கின்றார்.

குர்து இன மக்களுக்கு ஆதரவாகவும், ஆர்மேனிய மக்களின் படுகொலைகள் குறித்த இவரது கருத்துக்களை வெளியிட்டதற்காகவும் இவர் பல சர்ச்சைகளுக்கு ஆளானாது மட்டுமல்லாமல், வழக்குகளையும் எதிர் கொள்ள வேண்டியதாயிற்று.

துருக்கியில் கருத்துச் சுதந்திரம் குறித்து நடைபெறும் வாதங்களின் பகுதியாக இந்த வழக்குகள் விளங்குகின்றன என எமது செய்தியாளர் தெரிவிக்கின்றார்.

ஐரோப்பிய ஒன்றியத்தில் இணைய துருக்கிக்கு உள்ள தகுதியின் ஒரு பகுதியாகவும் இந்த வழக்குகள் திகழ்கின்றன.

Turkey says ties damaged by French approval of Armenia genocide bill

சர்ச்சையை ஏற்படுத்திய பிரான்சின் சட்டம்

	ஆர்மேனிய ஆர்பாட்டக்காரர்கள்

ஆர்மேனியர்களுக்கு எதிராக துருக்கியர்கள் 90 ஆண்டுகளுக்கு முன்னர் இனப்படுகொலைகளை செய்ததை மறுப்பது, குற்றமாக கருதப்படும் என்கிற பிரெஞ்சு நாடாளுமன்ற வாக்கெடுப்புக்கு பரவலான கண்டனம் எழும்பியுள்ளது.

இது ஒரு பொறுப்பற்ற செயல் எனறும், இரு நாடுகளுக்கும் இடையேயான உறவுகளுக்கும் இது ஒரு பெருத்த அடி எனவும் துருக்கிய அரசு கூறியுள்ளது. இது பொருளாதார விளைவுகளையும் ஏற்படுத்தும் எனவும் துருக்கிய அமைச்சர் ஒருவர் கூறியுள்ளார்.

இந்தத் தீர்மானம் நிறைவேற்றப்பட்டால், இந்த விடயம் குறித்து ஏற்படக்கூடிய இணக்கப்பாடு கடினமாகிவிடும் என ஐரோப்பிய ஒன்றியம் தெரிவித்துள்ளது.

ஐரோப்பிய ஒன்றியத்தில் துருக்கி சேரும் நம்பிக்கையில் உள்ளது என்பது குறிப்பிடத் தக்கது.

தனது மேலவையில் இது வாக்கெடுப்பிற்கு வரும் போது, இதைத் தொடர்ந்து எதிர்க்கப் போவதாக பிரெஞ்சு அரசு தெரிவித்துள்ளது.

பிரஞ்சு நாடாளுமன்றத்தின் கீழவையில் இந்த மசோதவுக்கு எதிர்ப்பு தெரிவித்து பல உறுப்பினர்கள் வெளியேறிய பிறகு இந்தத் தீர்மானம் நிறைவேற்றப்பட்டது.

அடுத்த ஆண்டு நடைபெறவுள்ள பிரெஞ்சு அதிபர் தேர்தலில், ஆர்மேனிய வம்சாவழியினரின் வாக்குகளை கவரவே இந்த வாக்கெடுப்பின் போது பல உறுப்பினர்கள் வெளியேறினர் என விமர்சகர்கள் கருத்து வெளியிட்டுள்ளார்கள்.