Oct 2nd Gandhi Jayanthi & Alcohol Served in Marriage Party attended by Minister

காந்தி ஜயந்தி தினத்தில் மது விருந்தில் பங்கேற்ற மத்திய அமைச்சர் செல்ஜா

சண்டீகர், அக். 5: காந்தி ஜயந்தி தினத்தில் மது சப்ளை செய்யப்பட்ட திருமண விருந்தில் பங்கேற்றார் மத்திய அமைச்சர் குமாரி செல்ஜா. இதன்மூலம் சட்டத்தை மீறியதற்கு தார்மிகப் பொறுப்பேற்று அவர் தமது பதவியை ராஜிநாமா செய்ய வேண்டும் என்று இந்திய தேசிய லோக தளம் கட்சியின் ஹரியாணா மாநிலத் தலைவர் அசோக் அரோரா கோரிக்கை விடுத்துள்ளார்.

அம்பாலா அருகே உள்ள மலை வாசஸ்தலத்தில் வெளிப்படையாக நடந்த திருமண விருந்து நிகழ்ச்சியில் அமைச்சர் பங்கேற்றது சட்டவிரோதமானது எனவும் அரோரா குறிப்பிட்டுள்ளார்.

அமைச்சரின் இச்செயல் தேசப்பிதா மகாத்மா காந்திக்கு அவமதிப்பை ஏற்படுத்தியுள்ளது. மது விருந்து நிகழ்ச்சியில் பங்கேற்ற அமைச்சர் செல்ஜாவுக்கு பதவியில் நீடிக்க உரிமையில்லை என்று சண்டீகரில் நிருபர்களிடம் புதன்கிழமை பேசிய அரோரா கூறினார்.

இதேபோல் ஹரியாணா முதல்வர் பூபிந்தர் சிங் ஹூடாவின் ஆலோசகர்களில் ஒருவரும் அதே தினத்தில் தமது வீட்டில் மது விருந்து அளித்துள்ளார் என்றார் அரோரா.

MiG-29 crashes in Ambala, pilot safe

ஹரியாணாவில் படைவிமானம் விழுந்து நொறுங்கியது: விமானி உயிர் தப்பினார்

அம்பாலா(ஹரியாணா), செப். 29: இந்திய விமானப்படையைச் சேர்ந்த மிக்-29 ரக விமானம் ஒன்று ஹரியாணா மாநிலம் அம்பாலா அருகே வியாழக்கிழமை விழுந்து நொறுங்கியது. விமானி பாராசூட் உதவியுடன் குதித்து உயிர் தப்பினார்.

விமானம் ஒரு வயலில் விழுந்தது. அங்கு வேலை செய்து கொண்டிருந்த 12 பேரும் அதிர்ஷ்டவசமாக உயிர் தப்பினர். அங்கிருந்த ஒரு டிராக்டர், விமானம் மோதியதில் சேதமுற்றது.

வழக்கமான சோதனைக்காக விமானி நாயக் என்பவர் விமானத்தை ஓட்டிச் சென்றார். விமானம் விபத்துக்குள்ளான போது அவர் பாராசூட் உதவியுடன் குதித்து தப்பினார். பின்னர் அவர் ராணுவ மருத்துவமனைக்கு சிகிச்சைக்காக கொண்டு செல்லப்பட்டார்.

விமானத்தின் உடைந்த பகுதிகள் அப்பகுதியில் ஆங்காங்கே சிதறிக் கிடந்தன. கீழே விழுந்த இடத்தில் 10 அடிக்குப் பள்ளம் ஏற்பட்டுள்ளது. உயர் அதிகாரிகள் விபத்து நடந்த இடத்தைப் பார்வையிட்டனர்

இந்த மிக்-29 ரக விமானம் ரஷ்யாவில் தயாரிக்கப்பட்டதாகும். அம்பாலா விமானப்படைத் தளத்திலிருந்து இது புறப்பட்டது. இந்த விபத்து தொடர்பாக ராணுவ நீதிமன்ற விசாரணைக்கு உத்தரவிடப்பட்டுள்ளது