Tamil News

BBC, Dinamani, Dinamalar, Maalai Malar et al

Archive for the ‘103’ Category

Auto rickshaw fares revised in Tamil Nadu – KN Nehru

Posted by Snapjudge மேல் ஜனவரி 10, 2007

ஜன.26 முதல் ஆட்டோ கட்டணம் இரு மடங்காக உயர்வு

சென்னை, ஜன. 11: ஜன. 26-ம் தேதி முதல் தமிழகத்தில் ஆட்டோ கட்டணம் ரூ.14 ஆக உயர்த்தப்படுவதாக போக்குவரத்து அமைச்சர் கே.என். நேரு தெரிவித்தார்.

இது குறித்து சென்னையில் நிருபர்களிடம் புதன்கிழமை அவர் கூறியது:

தற்போது ஆட்டோக்களுக்கு முதல் 2 கிலோ மீட்டருக்கு ரூ.7-ம் அதற்கு அடுத்த ஒவ்வொரு கிலோ மீட்டருக்கு ரூ.3.50-ம் கட்டணமாக நிர்ணயம் செய்யப்பட்டுள்ளது. இக் கட்டண விகிதம் 1996-ம் ஆண்டு நிர்ணயம் செய்யப்பட்டது.

கடந்த 10 ஆண்டுகளில் பெட்ரோல், டீசல் விலை பல மடங்கு உயர்ந்துள்ளதால் ஆட்டோ கட்டணம் உயர்த்தப்பட வேண்டும் என்று அரசுக்கு கோரிக்கைகள் வந்துள்ளன.

டீசல் விலை 4 மடங்கு உயர்ந்துள்ளதைக் கருத்தில் கொண்டு ஆட்டோ கட்டணங்களை உயர்த்த அரசு முடிவு செய்துள்ளது.

அதன்படி, முதல் 2 கிலோ மீட்டருக்கு ரூ.14-ம் அதற்கு அடுத்த ஒவ்வொரு கிலோ மீட்டருக்கு ரூ.6-ம் கட்டணமாக நிர்ணயிக்கப்படுகிறது. இந்த உயர்த்தப்பட்ட கட்டண விகிதம் ஜனவரி 26-ம் தேதி முதல் அமலுக்கு வருகிறது.

காத்திருப்புக் கட்டணம் ஒவ்வொரு 5 நிமிடத்திற்கும் 40 பைசாவாக நிர்ணயம் செய்யப்படுகிறது. இரவு நேர கட்டணங்கள் (இரவு 10 மணி முதல் காலை 5 மணி வரை) பகல் நேர கட்டணங்களை விட 25 சதவீதம் கூடுதலாக இருக்க வேண்டும் என்று நிர்ணயிக்கப்படுகிறது.

இது குறித்த ஆணை வெளியான 45 நாள்களில் கட்டணம் திருத்தப்பட்ட மின்னணு மீட்டர்கள் பொருத்தப்பட வேண்டும். மெக்கானிக்கல் மீட்டர்களில் 90 நாள்களுக்குள் கட்டணம் திருத்தப்பட வேண்டும். பழைய மெக்கானிக்கல் மீட்டர்களில் 6 மாதத்திற்குள் கட்டணம் திருத்தப்பட்டு பொருத்தப்பட வேண்டும்.

பொதுமக்கள் புகார் செய்யலாம்:ஆட்டோக்களுக்கு நிர்ணயிக்கப்பட்ட கட்டணத்தைவிட அதிமாக வசூலித்தால் 103, 26445511, 26444445 என்ற தொலைபேசி எண்களிலும் 9841808123 என்ற செல்போன் எண்ணுக்கு எஸ்.எம்.எஸ். மூலமும் தகவல் தெரிவிக்கலாம்.

இது குறித்த புகார்கள் மீது உடனடியாக நடவடிக்கை எடுக்க போலீஸôருக்கு உத்தரவிடப்பட்டுள்ளது. பயணிகள் உதவிக்காக ஒவ்வொரு ஆட்டோவிலும் புதிய கட்டண விகித அட்டவணை வைக்கப்பட வேண்டும். ஏற்கெனவே உள்ள ஆட்டோக்கள் படிப்படியாக கேஸ் ஆட்டோக்களாக மாற்றப்படும் என்றார் அவர்.

மக்கள் கருத்து: ஆட்டோக்களுக்கு நிர்ணயிக்கப்பட்ட கட்டணம் முதல் 2 கிலோ மீட்டருக்கு ரூ.7 ஆக இருந்தாலும் பெரும்பாலான ஆட்டோ டிரைவர்கள் அதைப் பின்பற்றுவதில்லை.

இந் நிலையில் தற்போது ஆட்டோ கட்டணம் இரு மடங்காக உயர்த்தப்பட்ட நிலையில், இக் கட்டண விகிதத்தை போலீஸôர் கடுமையாக அமல் செய்ய வேண்டும் என்று பொதுமக்கள் தெரிவித்தனர்.

ஆட்டோ வழி, தனி வழி

ஜனவரி 26 முதல் குறைந்தபட்ச ஆட்டோ கட்டணம் ரூ.14 ஆக உயர்த்தப்படுகிறது என்ற செய்தி குறித்து மக்களிடம் கருத்து கேட்டபோது, “இப்போதே அதைவிட அதிகமாகத்தான் கொடுத்துக் கொண்டிருக்கிறோம்’ என்று ஒரு விமர்சனத்தைக் கருத்தாகத் தெரிவித்தனர் பலர்.

ஏற்கெனவே நிர்ணயிக்கப்பட்ட குறைந்தபட்ச கட்டணம் ரூ.7 நடைமுறையில் இல்லை என்கிற கசப்பான அனுபவத்தின் வெளிப்பாடு இது. தற்போது கர்நாடகத்தில் குறைந்தபட்ச கட்டணம் ரூ.12. ஒவ்வொரு கி.மீ.க்கும் ரூ.6.50. ஆந்திரத்தில் குறைந்தபட்ச கட்டணம் ரூ.10. அடுத்த ஒவ்வொரு கி.மீ.க்கும் ரூ.5.60. கேரளத்தில் குறைந்தபட்ச கட்டணம் ரூ.10, அடுத்துவரும் ஒவ்வொரு 100 மீட்டருக்கும் 25 காசுகள். இக்கட்டணங்களும் விரைவில் மாற்றியமைக்கப்படலாம்.

கர்நாடகத்திலும், கேரளத்திலும் ஆட்டோக்களில் பேரம் பேசாமல் மீட்டர் கட்டணமே கணக்கிடப்படுகிறது. இந்த நிலை தமிழ்நாட்டில் இல்லை. ஆட்டோக்களைப் பயன்படுத்திக்கொள்ள நடுத்தர வருவாய்ப் பிரிவினர் தயாராக இருந்தாலும் ஆட்டோ கட்டணங்கள் அச்சுறுத்தலாக இருக்கின்றன. அவர்களை மீண்டும் பேருந்துகளுக்கே இழுத்துச் செல்கிறது.

ஆட்டோ ஒட்டுநர்களில் பாதிக்கும் மேற்பட்டோர் வாடகைக்கு ஓட்டுகின்றனர். நாள்வாடகை கொடுத்து, ரூ.50 வரையிலான சிறு பழுதுபார்ப்பு செலவுகளையும் ஏற்று, பெட்ரோல் போட்டு, அதற்குப்பின்தான் தங்களது வருவாயைப் பார்க்க வேண்டியிருக்கிறது என்பது உண்மையே. அதைக் காரணம் காட்டி, மீட்டருக்கு மேல் அதிகம் கேட்காமல், அரசு நிர்ணயிக்கும் கட்டணத்தில் ஆட்டோவை இயக்கினால் பயன்படுத்துவோர் எண்ணிக்கை அதிகமாகும். ஆட்டோக்களின் வருவாயும் அதிகமாகும். பயன்படுத்துவோர் எண்ணிக்கையை அதிகரிக்க சில நகரங்களில் சாதாரண ஆட்டோக்களும் ஷேர்ஆட்டோ போன்று இயங்குகின்றன. குறிப்பிட்ட வழித்தடத்தில், ஓரிடத்திலிருந்து இன்னொரு இடத்துக்குச் செல்ல ஒரு நபருக்கு இவ்வளவு கட்டணம் என தீர்மானிக்கப்படுகிறது. (உதாரணமாக சென்னை கிண்டி- அடையாறு; ஒரு நபருக்கு ரூ.10, வேலூரில் காட்பாடி – பழைய பேருந்து நிலையம்; ஒரு நபருக்கு ரூ.5) மூன்று பேரை ஏற்றிக் கொள்கிறார்கள். இதற்குப் பயணிகளிடம் ஆதரவு இருக்கிறது. இத்தகைய ஆட்டோக்கள் எப்போதும் ஓடிக் கொண்டே இருக்கின்றன. இந்த ஓட்டுநர்கள் ஒரு நாளைக்கு குறைந்தது 100 கிமீ அளவுக்கு இயக்குகின்றனர்.

உழைப்பு இருக்கிறது. இந்த உழைப்புக்குத் தயங்கி, இரண்டு மூன்று சவாரிகளிலேயே பணம் பார்த்துவிட நினைக்கும்போதுதான் அதிக கட்டணத்தைக் கேட்கும் நிலை ஏற்படுகிறது.

அதிகக் கட்டணம் வசூலிக்கும் ஆட்டோக்கள் மீது வட்டாரப் போக்குவரத்து அலுவலகமும், காவல்துறையும் இணைந்து நடவடிக்கை எடுத்தால் மட்டுமே இந்த அவலத்தை ஒழிக்க முடியும்.

தமிழகத்தின் புறநகர், கிராமப் பகுதிகளில் ஷேர் ஆட்டோக்கள் பயன்பாடு அதிகமாக இருக்கிறது. மினி பஸ் வசதி இல்லாத வழித்தடங்களில் இவற்றின் பங்கு பயனுள்ளதாக இருக்கிறது. ஆனால் இவை அடிக்கடி கவிழ்ந்து விபத்துக்குள்ளாகின்றன. இந்த வாகனத்தின் நீளம் மூன்று சக்கர வாகனத்துக்குப் பொருந்துவது அல்ல எனப் பொறியியல் துறையினர் சொல்கின்றனர்.

அதிகப் பயணிகளுடன் செல்லும் இந்த ஷேர் ஆட்டோக்கள் சிலசமயங்களில் குழிகளில் அல்லது திருப்பங்களில் எளிதில் சமன்குலைந்து கவிழ்கின்றன. இத்தகைய விபத்துகளில் குறைந்தது 20 பேர் காயமடைகின்றனர் என்பதைக் காண முடிகிறது. ஷேர் ஆட்டோக்களுக்கு 4 சக்கரம் பொருத்திக் கொள்ளும் அனுமதியை அரசு வழங்கினால், இத்தகைய விபத்துகள் பெருமளவு குறையும்.

Posted in 103, abuse, Auto, Auto driver Complaints, Auto rickshaw, Complaint, Diesel, Fares, Gas, KN Nehru, Petrol, Phone Numbers, Police, Report, Transportation Minister | Leave a Comment »