Sri Lanka faulted for public use of International Committee of the Red Cross (ICRC)’s confidential findings

புதுப்பிக்கப்பட்ட நாள்: 24 மார்ச், 2008

---

கிழக்கு மாகாணத்தில் தேர்தலை நடத்துவதில் அவசரம் கூடாது என்கிறார் ஆனந்தசங்கரி

	தமிழர் விடுதலைக் கூட்டணித் தலைவர் ஆனந்தசங்கரி

கிழக்கு மாகாணத்தில் தேர்தலை நடத்துவதில் இலங்கை அரசாங்கம் மிகுந்த வேகம் காட்டக் கூடாது என்று தமிழர் விடுதலைகூட்டணியின் தலைவரான வீ. ஆனந்தசங்கரி அவர்கள் கூறியுள்ளார்.

கிழக்கு மாகாணத்தில், இன்னமும் ஆயுதக்குழுக்களிடம் இருந்து ஆயுதங்கள் முழுமையாக களையப்படாத நிலையில், அங்கு மக்கள் சிந்தனை மற்றும் சுதந்திரம் ஆகியவை கட்டுப்படுத்தப்பட்ட நிலையிலேயே இன்னமும் இருப்பதாகவும் அவர் கூறுகிறார். ஆகவே ஆயுதங்கள் அங்கு களையப்பட வேண்டும் என்றும் அவர் குறிப்பிட்டுள்ளார்

இத்தகைய நிலையில் அவசரமாக அங்கு தேர்தல்களை நடத்துவது உசிதமானது அல்ல என்றும் அவர் குறிப்பிட்டுள்ளார்.

மக்களின் கருத்தைப் சரியாக பிரதிபலிப்பதாக இருந்தால், கிழக்கு மாகாணத்தில் இன்னமும் தேர்தல் ஒன்றை நடத்துவதற்கான சூழ்நிலை உருவாகவில்லை என்பதே உண்மை என்றும் ஆனந்தசங்கரி தெரிவித்துள்ளார்.

அவர் இது தொடர்பில் தமிழோசைக்கு வழங்கிய செவ்வியை இன்றைய நிகழ்ச்சியில் கேட்கலாம்.

---

புதுப்பிக்கப்பட்ட நாள்: 23 மார்ச், 2008

கிழக்கு மாகாண சபைத் தேர்தலில் தமிழ்த் தேசியக் கூட்டமைப்பு போட்டியிடாது: ஸ்ரீகாந்தா

இலங்கையின் கிழக்கு மாகாண சபைத் தேர்தலில் போட்டியிடவேண்டாம் என்று தமிழ்த் தேசியக் கூட்டமைப்பு முடிவெடுத்திருப்பதாக தமிழ்த் தேசியக் கூட்டமைப்பின் நாடாளுமன்ற உறுப்பினர் என்.ஸ்ரீகந்தா அவர்கள் தமிழோசைக்கு அளித்த சிறப்புச் செவ்வியில் தெரிவித்தார்.

கிழக்கு மாகாணத்திற்கு மட்டும் தனியாக பிரித்து தேர்தல் நடத்தப்படுவதன் மூலம், வடக்கு கிழக்கை நிரந்தரமாக பிரிப்பதற்கு இலங்கை அரசு முயல்வதாகவும், இந்த முயற்சிக்கு துணை போகக்கூடாது என்பதற்காகவே தமிழ்தேசிய கூட்டமைப்பு கிழக்கு மாகாண தேர்தலில் போட்டியிட வேண்டாம் என்று முடிவெடுத்திருப்பதாகவும் ஸ்ரீகாந்தா அவர்கள் தெரிவித்தார்.

இது தொடர்பில் தமிழோசைக்கு அவர் அளித்த சிறப்புச் செவ்வியை நேயர்கள் இன்றைய செய்தி அரங்கத்தில் கேட்கலாம்.

---

வட இலங்கை மோதல்கள்; முரண்பட்ட தகவல்கள்

	இலங்கை இராணுவத்தினர்

இலங்கையின் வடக்கே மன்னார், வவுனியா, மணலாறு மற்றும் முகமாலை, நாகர்கோவில் போர் முன்னரங்குகளில் சனியன்றும் ஞாயிறன்றும் இராணுவத்தினருக்கும் விடுதலைப் புலிகளுக்கும் இடையில் கடும் மோதல்கள் இடம்பெற்றதாக இருதரப்பினரும் தெரிவித்திருக்கின்றனர்.

மன்னார் உயிலங்குளத்திற்கு வடக்கில் உள்ள முன்னரங்கப் பகுதிகளில் இராணுவத்தினர் முன்னேறிச் சென்று விடுதலைப் புலிகளிடமிருந்து ஒரு சதுர கிலோ மீட்டர் பரப்பளவான பிரதேசத்தைக் கைப்பற்றியதாகத் தெரிவித்துள்ள இராணுவத்தினர், சண்டைகளின்போது இரு தரப்பிலும் கொல்லப்பட்டவர்களின் எண்ணிக்கை அதிகரித்திருப்பதாகவும், அதன்படி, 22 விடுதலைப் புலிகளும் 4 படையினரும் கொல்லப்பட்டிருப்பதாகவும் தெரிவித்திருக்கின்றனர்.

விடுதலைப் புலிகளின் 11 உடல்களும், ஆயுதங்களும் கைப்பற்றப்பட்டிருப்பதாகத் தேசிய பாதுகாப்புக்கான ஊடகத் தகவல் மையம் குறிப்பிட்டிருக்கின்றது.

மன்னார் பாலைக்குழி, இத்திக்கண்டல் ஆகிய பகுதிகளில் இருந்து சனிக்கிழமை அதிகாலையில் விடுதலைப் புலிகளின் பிரதேசத்தினுள் முன்னேறுவதற்கு முயன்ற இராணுவத்தினர் மீது மாலை வரையில் நடத்தப்பட்ட தாக்குதல்களில் 55 படையினர் கொல்லப்பட்டிருப்பதாகவும், நூற்றுக்கும் மேற்பட்டவர்கள் காயமடைந்துள்ளதாகவும் விடுதலைப் புலிகள் தெரிவித்திருக்கின்றனர்.

தமது கடுமையான எதிர்த் தாக்குதல்களையடுத்து, படையினர் தமது முன்னேற்ற முயற்சியைக் கைவிட்டு, தமது பழைய நிலைகளுக்குத் திரும்பியுள்ளதாகவும் விடுதலைப் புலிகள் கூறியிருக்கின்றனர்.

வவுனியா, மணலாறு, முகமாலை, நாகர்கோவில் ஆகிய முன்னரங்கப் பகுதிகளில் இடம்பெற்ற சண்டைகளில் மேலும் 23 விடுதலைப் புலிகளும் 4 இராணுவத்தினரும் கொல்லப்பட்டிருப்பதாகவும் பாதுகாப்பு அமைச்சகம் கூறியிருக்கின்றது. எனினும் இது குறித்து விடுதலைப் புலிகள் தரப்பிலிருந்து உடனடியாகத் தகவல்கள் எதுவும் வெளியாகவில்லை.

இதற்கிடையில் சனிக்கிழமை யாழ் மாவட்டத்திற்கு விஜயம் செய்த இராணுவத் தளபதி லெப்டினன் ஜெனரல் சரத் பொன்சேகா, அங்கு போர் நிலைமைகள் மற்றும் பாதுகாப்பு நிலைமைகள் தொடர்பாக இராணுவ உயரதிகாரிகளிடம் விரிவாகக் கேட்டறிந்துள்ளதாகத் தேசிய பாதுகாப்புக்கான ஊடகத் தகவல் மையம் தெரிவித்திருக்கின்றது.

 

---

 

புதுப்பிக்கப்பட்ட நாள்: 21 மார்ச், 2008

---

கிழக்கு மாகாண சபைத் தேர்தலில் தமிழ்த் தேசியக் கூட்டமைப்பு போட்டியிடுவது பற்றிய முடிவு விரைவில்: மாவை சேனாதிராஜா

இலங்கையின் கிழக்கு மாகாண சபைத்தேர்தலில் போட்டியிடுவதா இல்லையா என்பது குறித்து தமிழ்தேசிய கூட்டமைப்பு கடந்த சிலநாட்களாக தொடர்ந்து ஆலோசனை கூட்டங்களை நடத்தி வருகிறது.

சமீபத்தில் நடந்த மட்டக்களப்பு மாநகரபை உள்ளிட்ட சில உள்ளாட்சி மன்றத்தேர்தல்களில் தமிழ்தேசிய கூட்டமைப்பு போட்டியிடவில்லை. அந்த தேர்தல்களில் தமிழ்தேசிய கூட்டமைப்பு போட்டியிடாததற்கு கூறப்பட்ட காரணங்கள், கிழக்கு மாகாணசபை தேர்தல்கள் விடயத்திற்கும் பொருந்தும் என்கிறார் தமிழ் தேசிய கூட்டமைப்பின் நாடாளுமன்ற உறுப்பினர் மாவை சேனாதி ராஜா அவர்கள்.

அதேவேளை, கிழக்கு மாகாணசபை தேர்தல்கள் விடயத்தில் இறுதி முடிவெடுப்பதற்கு முன்பு, கிழக்கு மாகாணத்தில் வாழும் முஸ்லீம் தரப்பு கருத்தை அறிய தமிழ்தேசிய கூட்டமைப்பு விரும்புவதாகவும், இது தொடர்பில் ஸ்ரீலங்கா முஸ்லீம் காங்கிரஸ் கட்சியுடன் தமிழ்தேசிய கூட்டமைப்பு தற்போது பேச்சு வார்த்தைகள் நடத்தி வருவதாகவும் அவர் தெரிவித்தார்.

இன்னமும் இரண்டொரு நாட்களில் இது தொடர்பில் தமிழ்தேசிய கூட்டமைப்பு இறுதி முடிவு எடுத்து அறிவிக்கும் என்றும் அவர் கூறினார்.

இது தொடர்பில் மாவை சேனாதிராஜா அவர்கள் தமிழோசைக்கு வழங்கிய பிரத்யேக செவ்வியை நேயர்கள் இன்றைய செய்தி அரங்கத்தில் கேட்கலாம்.

---

இலங்கை முல்லைத்தீவு கடற்பரப்பில் நடந்த குண்டுத் தாக்குதலில் இராணுவ தரப்பில் சேதம்

இலங்கையின் வடக்கே முல்லைத்தீவு மாவட்டம் நாயாறு கடற்பரப்பில் இன்று அதிகாலை இடம்பெற்ற விடுதலைப் புலிகளின் கடற்கண்ணிவெடி தாக்குதல் என்று கருதப்படும், குண்டு வெடிப்பு சம்பவத்தில் கடற்படையின் அதிவேகப்படகு ஒன்று மூழ்கியதாகவும், அதிலிருந்த 16 கடற்படையினரில் 6 பேர் காப்பாற்றப்பட்டிருப்பதாகவும் காணாமல்போயுள்ள ஏனைய 10 பேரைக் கண்டுபிடிப்பதற்கான தேடுதல் நடவடிக்கை மேற்கொள்ளப்பட்டிருப்பதாகவும், தேசிய பாதுகாப்புக்கான ஊடகத் தகவல் மையம் தெரிவித்திருக்கின்றது.

எனினும் நாயாறு கடற்பரப்பில் கடற்படையினருடன் இடம்பெற்ற மோதல் ஒன்றின்போது கடற்படையினருக்குச் சொந்தமான அதிவேகப்படகு மூழ்கடிக்கப்பட்டதாகவும், இந்தத் தாக்குதலில் 14 கடற்படையினர் கொல்லப்பட்டதாகவும் விடுதலைப் புலிகள் கூறியிருக்கின்றார்கள். தமது தரப்பில் 3 கரும்புலிகள் கொல்லப்பட்டிருப்பதாகவும் விடுதலைப் புலிகள் தெரிவித்துள்ளனர்.

இந்தச் சம்பவம் குறித்து இராணுவத்தின் சார்பில் பேசவல்ல அதிகாரியாகிய பிரிகேடியர் உதய நாணயக்காரவுடன் தொடர்புகொண்டு கேட்டபோது, விடுதலைப் புலிகளின் கடற்கண்ணிவெடியிலேயே கடற்படைக்குச் சொந்தமான அதிவேகப்படகு மூழ்கியதாகத் தெரிவித்தார்.

விடுதலைப் புலிகள் கடற்கண்ணிவெடிகளை வைத்திருந்ததாகக் கூறுகின்றீர்களே, இதேபோன்று கடற்படையினரும் கடலில் கண்ணிவெடிகளைப் புதைத்திருப்பதாகவும், இதற்கு இந்தியத் தரப்பிலிருந்து எதிர்ப்பு தெரிவிக்கப்பட்டிருக்கின்றதே என கேட்டதற்கு, நாயாறு கடற்பரப்பில் கண்ணிவெடி வைக்க வேண்டிய அவசியம் கடற்படையினருக்கு இல்லை என்று அவர் தெரிவித்தார்.

இதேவேளை, நாயாறு மற்றும் புதுக்குடியிருப்பு பகுதிகளில் உள்ள விடுதலைப் புலிகளின் கடற்தளங்கள் மீது விமானப்படையினர் சனிக்கிழமையன்று தாக்குதல்கள் நடத்தியுள்ளனர் என்றும் பிரிகேடியர் உதய நாணயக்கார தெரிவித்தார்.

இந்த மோதல்கள் குறித்த மேலதிக விபரங்களை நேயர்கள் செய்தியரங்கத்தில் கேட்கலாம்.

---

இரகசியத் தகவல்களை இலங்கை வெளியுறவு அமைச்சு தவறாகப் பயன்படுத்தியுள்ளது: செஞ்சிலுவைச் சங்கம் குற்றச்சாட்டு

ஆட்கள் காணாமல்போன சம்பவங்கள் மற்றும் சட்டத்துக்குப் புறம்பான ஆட்கொலைகள் ஆகியவை குறித்து இலங்கை அரசுக்கு தாம் வழங்கிய தகவல்களை இலங்கை வெளியுறவு அமைச்சு தவறாகப் பயன்படுத்தி விட்டதாக சர்வதேச செஞ்சிலுவைச் சங்கம் கூறியுள்ளது.

அண்மையில், அமெரிக்க அரசுத்துறை இலங்கை மனித உரிமைகள் நிலவரம் குறித்து வெளியிட்ட அறிக்கை ஒன்றுக்கான பதில் அறிக்கையிலேயே, தாம் வழங்கிய ரகசிய தகவல்களை இலங்கை அரசு பகிரங்கமாக வெளியிட்டுள்ளதாக செஞ்சிலுவைச் சங்கம் குற்றம் சாட்டியுள்ளது.

காணாமல் போனவர்கள் குறித்து தாம் கண்டுபிடித்த தகவல்களை இருதரப்புக்கும் இடையேயான பரிமாற்றத்துக்கு மாத்திரமானது என்ற அடிப்படையிலேயே தாம் இலங்கை அரசுக்கு ரகசியமாகத் தந்ததாகவும், ஆனால் அதனை இலங்கை அரசு பகிரங்கப்படுத்திவிட்டது என்றும் செஞ்சிலுவைச் சங்கம் குற்றஞ்சாட்டியுள்ளது.

அதேவேளை அவை வெளியிடப்பட்ட வழியிலும் தவறு இடம்பெற்றுள்ளதாகவும் அது கூறியுள்ளது.

இத்தகைய தகவல்கள் பகிரங்கமாக விவாதிக்கப்படும் பட்சத்தில், இந்த விடயங்களைக் கையாள்வது சிரமமாகிவிடும் என்றும் செஞ்சிலுவைச் சங்கம் கூறியுள்ளது.

இது தொடர்பில் சர்வதேச செஞ்சிலுவைச் சங்கத்தின் தலைமைப் பேச்சாளர், புளோரியான் வெஸ்வெல் அவர்கள் வழங்கிய செவ்வியை நேயர்கள் இன்றைய நிகழ்ச்சியில் கேட்கலாம்.

---

புதுப்பிக்கப்பட்ட நாள்: 20 மார்ச், 2008

---

கிழக்கு மாகாண சபைத் தேர்தலில் போட்டியிடுவது குறித்து தமிழ்த் தேசியக் கூட்டமைப்பினர் கூட்டம்

இலங்கையின் கிழக்கு மாகாண சபைக்கான தேர்தல்களை நடத்துவது என்று அரசுமுடிவெடுத்துள்ள சூழலில், இந்த தேர்தலில் போட்டியிடுவதா என்பது குறித்து ஆராய, தலைநகர் கொழும்பில், தமிழ் தேசிய கூட்டமைப்பு நாடாளுமன்ற உறுப்பினர்களின் கூட்டம் வியாழக்கிழமை மாலை நடந்தது.

இந்த கூட்டத்தில் தேர்தலில் போட்டியிடுவதா, அல்லது தவிர்ப்பதா என்பது குறித்த இரு கருத்துக்களும் ஆராயப்பட்டன என்றும் ஆயினும் இது வரை எந்த முடிவும் எடுக்கப்படவில்லை என்றும் தமிழ் தேசியக்கூட்டமைப்பு வட்டாரங்கள் தமிழோசையிடம் தெரிவித்தன.

எதிர்வரும் ஒரிரு நாட்களில் இது குறித்து மேலும் ஆராய்ந்து ஒரு முடிவு எடுக்கப்படும் என்று அவ்வட்டாரங்கள் தெரிவித்தன.

 

---

ரூபவாஹினி நிர்வாகியாக முன்னாள் இராணுவ அதிகாரியின் நியமனம்: ஊடகங்கள் அதிருப்தி

இலங்கை அரசாங்கத்தின் தொலைக்காட்சியான ரூபவாஹினி நிறுவனத்தின் நிர்வாகியாக ஓய்வுபெற்ற இராணுவ அதிகாரி ஒருவர் நியமிக்கப்பட்டது தொடர்பில் தொடர்பூடக உரிமைச் செயற்பாட்டாளர்கள் இலங்கை அரசாங்கத்தை விமர்சித்துள்ளார்கள்.

சுதந்திர ஊடக அமைப்பின் அமைப்பாளர் சுனந்த தேசப்பிரிய, இது தொடர்பில் கருத்துக் கூறுகையில், இந்த நடவடிக்கை மூலம், நெருக்கடி நிலைமைகளில், ஒளிபரப்பப்படும் நிகழ்ச்சிகளில் பெரும் ஆளுமையை அரசாங்கம் செலுத்த முடியும் என்று கூறியுள்ளார்.

இந்தக் குற்றச்சாட்டை நிராகரித்துள்ள இலங்கையின் ஊடக அமைச்சர் அநுர பிரியதர்ஷன யாப்ப அவர்கள், தொலைக்காட்சி நிறுவனத்தின் நிர்வாகத்தைப் பலப்படுத்துவது மாத்திரமே இந்த நியமனத்தின் நோக்கம் என்று கூறியுள்ளார்.

தமது 5 சகாக்கள் மீது தொடர்ச்சியாக நடத்தப்பட்ட தாக்குதலை அடுத்து, அந்த நிறுவனத்தின் ஊழியர்களால் நடத்தப்பட்ட எதிர்ப்பு நடவடிக்கையை தொடர்ந்தே, இந்த நகர்வு மேற்கொள்ளப்பட்டுள்ளது.

---

 

Iranian Textbooks Teach Islamic Supremacy, Inequality for Women and Non-Muslims, Study Finds

இரானில் பள்ளிக் குழந்தைகளுக்கு ‘இஸ்லாமியர்களே உயர்ந்தவர்கள்’ என பாடம் புகட்டப்படுவதாக அமெரிக்க அமைப்பு குற்றச்சாட்டு

இரானின் பள்ளிக் குழந்தைகள் இஸ்லாத்தின் ஈடு இணையற்ற உயர் நிலையை ஏற்றுக்கொள்ள வேண்டும் என்றும், முஸ்லிம் அல்லாதவர்களை சந்தேகக் கண்கொண்டு பார்க்கவேண்டும் என்றும், இரானிய அரசு அவர்களுக்கு பாடம் புகட்டி வருகிறது என்று அமெரிக்காவில் இருந்து இயங்கும் ‘ஃபிரீடம் ஹவுஸ்’ என்ற அமைப்பு கூறியுள்ளது.

இரானிய பள்ளிக்கூடங்களில் கட்டாயப் பாடமாக்கப்பட்டுள்ள பாட நூல்களில் 95 நூல்களை ஆராய்ந்து வெளியிட்டுள்ள மதிப்பீட்டு அறிக்கையில், பள்ளிச் சிறார்களின் சகிப்புத்தன்மை மிகவும் முறையாக அகற்றப்பட்டுள்ளது என்றும், இதனை தற்செயலானது என்று கூற முடியாது என்றும் கூறப்பட்டுள்ளது.

இரானின் உள்ளூரில் பார்சி மொழி பேசுவோரால் நடத்தப்பட்ட இந்த மதிப்பீட்டின்படி, பெண்கள் ஆண்களைவிட கருத வேண்டும் என்றும், மேற்குலக நாடுகளை சாத்தான்கள் போலக் கருத வேண்டும் என்றும், இரானிய பாட நூல்கள் பள்ளிச் சிறார்களுக்கு பாடம் புகட்டுவது தெரிகிறது.

இரானின் அடுத்த தலைமுறையினர் வெளியுலகத்தை எவ்வாறு நோக்க வேண்டும் என்பதையே இந்த நூல்கள் திட்டமிட்டு வடிவமைப்பதாக அந்த அறிக்கை கூறுகிறது.

Kalainjar Karunanidhi & Sun TV Maran bros: Oh Pakkangal – Njaani in Kumudham

ஓ பக்கங்கள் – 6

நன்றி : குமுதம்

தாத்தாவும் பேரனும் சந்தித்துப் பேசினால் அது பரபரப்பான செய்தியாகும் ஆச்சரியம் தி.மு.க அரசியலுக்கு மட்டுமே உரியது. சன் டி.வி. அதிபர் கலாநிதி மாறன் தன் தாத்தாவான கலைஞர் கருணாநிதியை சுமார் ஓராண்டுக்குப் பிறகு சந்தித்தது அரசியல் திருப்புமுனையாக கருதப்படுகிறது!

பாட்டாளி மக்கள் கட்சி தி.மு.க கூட்டணியில் நீடிக்குமா நீடிக்காதா என்பதை விட அதிக ஆர்வத்துடன் தமிழக அரசியலில் அலசப்படுவது தி.மு.க தலைவர் கலைஞர் கருணாநிதியின் குடும்பங்களுக்குள் நடக்கும் அரசியல்தான். வேறு எந்த அரசியல் கட்சியிலும் இந்த நிலை இல்லை. தி.மு.க.வில் இந்த நிலை இருப்பதற்குக் காரணம் கலைஞரேதான்.

கட்சிக்குள் நெடுஞ்செழியன், அன்பழகன் போன்ற சீனியர்களை ஓரங்கட்டிவிட்டு 1969ல் முதன்முறை அவர் முதலமைச்சரானபோது, அதற்கு பெரும் உதவியாக இருந்தவர் எம்.ஜி.ஆர்தான். சினிமா செல்வாக்கால் பெரும் மக்கள் ஆதரவுடன் இருந்த எம்.ஜி.ஆர் மட்டும் அப்போது தன்னை ஆதரிக்காமல் எதிர்த்திருந்தால், தான் நிச்சயம் முதலமைச்சராகியிருக்க முடியாது என்பது அப்போதே கலைஞருக்குத் தெரியும். அரசியல் சாணக்கியத்தில் வல்லவர் என்று அன்று முதல் இன்று வரை பெயரெடுத்திருக்கும் அவர், தன்னை மேலே தூக்கி வைத்த கையே கீழே இறக்கினால் என்ன செய்வது என்ற கவலையில் அந்தக் கையை பலவீனப்படுத்தும் வேலைகளில் அப்போது இறங்கினார்.

அதில் பலியானவர்தான் இப்போது மணி விழா கொண்டாடிய அவரது மூத்த மகன் மு.க.முத்து.

அருமையான குரல்வளம் உடையவர் முத்து. ஏ.எம்.ராஜா, பி.பி.ஸ்ரீனிவாஸ், எஸ்.பி.பாலசுப்பிரமணியம் குரல்வகைகளைச் சேர்ந்தது முத்துவின் குரல். ஒரு பாடகராகவோ, டப்பிங் கலைஞராகவோ தன் வாழ்க்கையைச் சிறப்பாக அமைத்துக் கொண்டிருக்கும் வாய்ப்பிருந்த முத்துவை, தன் அரசியலுக்காக, எம்.ஜி.ஆருக்கு எதிராக நிறுத்தினார் கலைஞர். சினிமாவில் எம்.ஜி.ஆர் வகித்து வந்த இடத்தை முத்துவைக் கொண்டு கைப்பற்ற அவர் போட்ட திட்டம் படு தோல்வியடைந்தது. முத்து வேறுவிதமான நடிகராகக் கூட சினிமாவில் இடம் பிடித்திருக்க முடியும். ஆனால், அவரை எம்.ஜி.ஆரை இமிடேட் செய்யவைத்து எம்.ஜி.ஆர். இடத்தைப் பிடித்துவிட செய்த முயற்சி அபத்தமான தோல்வியில் முடிந்தது.

தன் 22 வயதிலிருந்து 26 வயது வரை இப்படி திசை மாற்றப்பட்ட முத்துவின் வாழ்க்கையும் திசை மாறி, தனக்கும் பிறருக்கும் வேதனைகளும் வலிகளும் நிரம்பியதாகியது. அதிலிருந்து மீண்டு வந்து அறுபதாம் வயதிலேனும் அவர் அமைதியைப் பெறுவதற்கு அவரது குழந்தைகள் அவருக்கு உதவியிருக்கிறார்கள் என்பது ஒரு மகத்தான ஆறுதல்.

தன் அரசியலுக்காக தன் குடும்பத்தை கலைஞர் பயன்படுத்துவதும், குடும்பம் தன் நலனுக்காக அந்த அரசியலைப் பயன்படுத்திக் கொள்வதும் தொடர் நிகழ்ச்சிகளாகிவிட்டன. இந்த கலாசாரம் தி.மு.கழகத்தில் அவரால் வளர்க்கப்பட்டு ஒவ்வொரு மாவட்டத்திலும் வட்டாரப் பிரமுகர்களின் குடும்பங்களின் அரசியல் நடக்கிறது. இது இதர கட்சிகளுக்கும் பரவிவிட்டது. விளைவாக, இன்று எந்தக் கட்சியிலும் உட்கட்சி ஜனநாயகம் என்பதே இல்லை.

உட்கட்சி ஜனநாயகம் என்பது இல்லாமல் ஆக்கப்பட்டதினாலேதான், கலைஞர் நினைத்தால் ஒரே நாளில் பேரன் தயாநிதி மாறனை எம்.பி.யாக்கி மத்திய அமைச்சராகவும் ஆக்கிவிட முடிந்திருக்கிறது. ஒரே நாளில் தூக்கி எறியவும் முடிகிறது. இன்னொரு நாள் மகள் கனிமொழியை எம்.பி.யாக்க முடிகிறது. ‘தந்தையைக் கொன்ற பிரகலாதா, ஜாக்கிரதை’ என்று எச்சரிக்கைக் கவிதை எழுத முடிகிறது. அடுத்த நாளே தயாநிதியின் அண்ணன் கலாநிதியை பேச்சு வார்த்தைக்கு வர அனுமதிக்கவும் முடிகிறது.

தயாநிதி மாறனை மத்திய அமைச்சர் பதவியிலிருந்து தூக்கியபோது, கட்சி அடிப்படை உறுப்பினர் பதவியிலிருந்து ஏன் நீக்கக்கூடாது என்று காரணம் கேட்டு நோட்டீஸ் அனுப்பப்பட்டது. அவர் அளித்த விளக்கம் ஏற்கப்பட்டதா இல்லையா என்று எட்டு மாதமாகியும் கட்சி சொல்லவில்லை. அவருடைய எம்.பி. பதவியும் தொடர்கிறது. கூடவே பிரகலாதனே ஜாக்கிரதை என்று அர்ச்சனை ! இன்னொரு மகன் அழகிரியைப் பற்றி அதிகாரபூர்வமாக சொல்ல எதுவும் இல்லை. அவர் கட்சிக்காரரா இல்லையா என்பது அவருக்கும் கலைஞருக்கும் மட்டுமே தெரிந்த ரகசியம்.

குடும்பத்தில் தான் வளர்த்த சிலர் சிறப்பாக வருவதும், சிலர் வீணாகிப் போவதும், சிலர் தன் மார்பிலேயே பாய்வதும் எந்தத் தந்தைக்கும் மாறி மாறி மகிழ்ச்சியும் வேதனையும் தரும் நிகழ்வுகள்தான். கட்சித் தலைவர், குடும்பத் தலைவர் என்ற இரு பாத்திரங்களையும் போட்டுக் குழப்பிக் கொண்டுவிட்ட கலைஞர், இதில் அனுபவித்த உணர்ச்சிகளை அவரே தன் ‘நெஞ்சுக்கு நீதி’ சுயசரிதைத் தொடரில் பகிர்ந்துகொண்டால்தான் முழுமையாக நம்மால் உணர முடியும். ஆனால் அவர் இது பற்றியெல்லாம் அதில் எழுதுவதில்லை.

இன்று தமிழக பத்திரிகைகள் கவனம் எல்லாம் மாறன் சகோதரர்களும் ஸ்டாலினும் ஓரணியில் வருவார்களா ? வந்தால் ஸ்டாலின்அழகிரி ‘தற்காலிகக் கூட்டு’ என்ன ஆகும் ? கனிமொழி யார் பக்கம் ? மறுபடியும் எல்லாரும் ஓரணி ஆகிவிடுவார்களா? என்பது போன்ற அலசல்களில் இருக்கின்றது.

தி.மு.க.வுக்குள் அண்மை வருடங்களில் நடந்து வந்திருக்கும் அதிகாரப் போட்டிகளை கவனித்தால் சில போக்குகள் புரியும். கட்சிக்குள் வைகோவின் வளர்ச்சி ஸ்டாலினுக்கு ஆபத்தானது என்பதால், வைகோ வெளியேற்றப்பட்டார். எம்.ஜி.ஆரை வெளியேற்றியது போல கலைஞர் செய்த இரண்டாவது தவறு இது. வைகோ வெளியேறியதால் சுமார் ஒரு தலைமுறை இளைஞர்களை தி.மு.க இழந்தது. மத்திய அரசியலுக்கு தேவைப்படும் கூட்டணித் தந்திரங்களை கலைஞர் சரியாகப் பின்பற்றும் ஒரே காரணத்தினால்தான் தி.மு.க இன்னும் தப்பிக்கிறது.

முரசொலி மாறன் மறைவுக்குப் பின் தயாநிதியைக் கொண்டு வந்தபோது கலைஞர் போட்ட கணக்கில் தப்பான விஷயம், தனக்கு முரசொலி மாறன் இருந்ததைப் போல ஸ்டாலினுக்கு தயாநிதி இருப்பார் என்ற கணக்குதான். தொடர்ந்து அதே தப்புக் கணக்கை அவர் கனிமொழி விஷயத்திலும் போட்டுக் கொண்டிருக்கிறார். கனிமொழி அரசியலில் நுழையும்போதே கட்சிக்குள்ளும் குடும்பத்துக்குள்ளும் தன் கூட்டணியை அமைத்துவிட்டார். மதுரைக்குப் போய் அழகிரியைச் சந்தித்து ஆசி பெற்றது அதை உணர்த்தியது. மூத்தவர் என்பதற்காக முத்துவைத் தேடிப் போகவில்லை.

உண்மை என்ன ? தயாநிதியும் கனிமொழியும் ஸ்டாலின் தலைமுறைக்காரர்களல்ல. தாங்களே நேரடியாக அதிகாரத்தைச் சுவைக்கும் வாய்ப்பு வரும்போது அதை வேறு யாரோடோ பகிர்ந்து கொள்ளும் பார்வை இந்தத் தலைமுறைக்குக் கிடையாது.

எனவே இன்று தி.மு.க.வுக்குள் தயாநிதியும் சரி, கனிமொழியும் சரி தாங்களே முதலமைச்சர் பதவிக்குத் தகுதியானவர்கள்தான் என்று நம்புகிற, ஆசைப்படக்கூடிய தலைமுறையின் பிரதிநிதிகள். கலைஞர் அந்தப் பதவியில் இருக்கும்வரை காத்திருப்பார்கள். அவருக்குப் பின் ஸ்டாலின் முதலமைச்சர் என்ற நிலை வந்தால் அது அவர்களுக்கு உவப்பானதல்ல. மத்திய அமைச்சர் பதவியால் கிடைத்த செல்வாக்கு, விளம்பரம், புகழ் எல்லாம் தயாநிதியை, மாநில முதலமைச்சர் பதவிக்காக மெல்ல காய் நகர்த்தும்

ஆசையைத் தூண்டின. அதன் விளைவாகத்தான் ஸ்டாலினையும் அழகிரியையும் மேலும் பிரிக்கும் நோக்கத்துடன் ‘தினகரன்’ சர்வே வெளியிடப்பட்டது.அதுவோ எதிர்மறை விளைவை ஏற்படுத்தியது.

கலைஞர் முதுமையினாலும் உடல் நலக்குறைவினாலும் சிரமப்படாமல் வேலைபளுவைக் குறைத்துக் கொள்ள முதலமைச்சர் பதவியை ஸ்டாலினுக்குக் கொடுத்துவிட்டு, தான் கட்சித் தலைவராக மட்டும் இருந்து வழிகாட்டலாமே என்று நான் ‘ஓ’பக்கங்களில் எழுதியதும், அதற்குக் கடும் எதிர்ப்பு கனிமொழியின் ஆதரவாளர்களிடமிருந்துதான் வந்தது. அவர்கள்தான் கண்டனக் கூட்டம் போட்டார்கள். காரணம், என் கட்டுரையின் விளைவாக ஸ்டாலினுக்கு துணை முதலமைச்சர் பதவியை கலைஞர் கொடுத்துவிட்டால் என்ன செய்வது என்ற அச்சம்தான். ஸ்டாலினிடமிருந்தோ அவர் ஆதரவாளர்களிடமிருந்தோ எனக்கு பெரும் கண்டனங்கள் ஏதுமில்லை.

இன்று தி.மு.க.வுக்குள் அதிகாரப் போட்டி பலமாக நடக்கிறது. போட்டி முழுவதும் ஒரு குடும்பத்தினருக்குள்தான். அழகிரி, ஸ்டாலின், தயாநிதி, கனிமொழி என்று நால்வர் போட்டியில் இருக்கிறார்கள். இருப்பதோ இரு பெரும் பதவிகள் மட்டும்தான். முதலமைச்சர் பதவி. கட்சித்தலைவர் பதவி. இப்போது இரண்டையும் ஒருவரே வைத்திருக்கிறார். அடுத்த கட்டத்தில் இது பிரிக்கப்படும் சூழல் வரும். அப்போது யாருக்கு எது? கட்சிக்குள் இதற்கு சிறந்த முன்னுதாரணங்களாக இருப்பவர்கள் கலைஞரும் பேராசிரியரும்தான். பேராசிரியர் கலைஞரை விட மூத்தவர். வயதில் மட்டுமல்ல. அரசியலிலும் மூத்தவர். ஆனால் நம்பர் டூ பதவியை நிரந்தரமாக ஏற்றுக் கொண்டு அரசியலில் நிம்மதி கண்டவர். ஸ்டாலினை தன் முதலமைச்சராகவோ தலைவராகவோ ஏற்கவும் தயாரான மன நிலையில் இருப்பவர் என்று பலமுறை தன் பேச்சுக்களில் உணர்த்தியிருக்கிறார்.அவ்வளவு ‘பக்குவம்‘ வாய்ந்தவர்.

தயாநிதியும் ஸ்டாலினும் கலைஞர், பேராசிரியர் போல திகழலாம். அல்லது கனிமொழியும் அழகிரியும் அது போலத் திகழ முயற்சிக்கலாம். தமிழ்நாட்டை இரு மாநிலங்களாகப் பிரித்துவிட்டால் இரு அணிகளுக்கும் சிறந்த சமவாய்ப்பு கிட்டும்.

எப்படிப் பார்த்தாலும் இன்னும் முப்பது நாற்பது ஆண்டுகளுக்கு தி.மு.க ஆட்சி அமைத்தால், கலைஞர் குடும்ப வாரிசுகளே தலைமைப் பதவிகளில் இருப்பார்கள். தி.மு.கவில் ஓ.பன்னீர்செல்வங்களுக்கான வாய்ப்புகள் மிகக் குறைவு..

இந்த வார கேள்வி

தன் பேரக் குழந்தைகளை தமிழ் கற்பிக்கும் டெல்லி தமிழ்ச் சங்கப் பள்ளிகளில் சேர்க்காமல் ஆங்கில கான்வெண்ட்டில் சேர்த்துப் படிக்க வைத்த குற்றச்சாட்டுக்கு ஆளான பா.ம.க நிறுவனர் ராமதாஸ், தமிழ்நாட்டில் மட்டும் தமிழ் வழிக் கல்வியை ஏற்படுத்திவிடுவார் என்று எப்படி முன்னாள் துணை வேந்தர்கள் வசந்தி தேவி, அவ்வை நடராஜன் போன்றோர் நம்புகிறார்கள் ? வேட்பாளர் சொத்துக் கணக்கு வெளியிடுவது போல தமிழ் வழிக்கல்வி பற்றிப் பேசும் அரசியல்வாதிகள் தங்கள் குடும்பக் குழந்தைகள் யார் யார் எந்தெந்தப் பள்ளிகளில் என்ன படிக்கிறார்கள் என்ற விவரங்களை உடனடியாக வெளியிட முன்வருவார்களா? ஆரம்பக் கல்வியை தமிழ் வழிக் கல்வியாக மாற்றக் கோருபவர்கள், முதல் கட்டமாக தங்கள் வீட்டுக் குழந்தைகளை ஏற்கெனவே தமிழ் மீடியம் இருக்கும் எண்ணற்ற அரசுப் பள்ளிகளுக்கு ஜூன் 1 முதல் மாற்றி அனுப்புவார்களா ? தமிழ் வழிக்கல்வி என்பது ஏழைத் தமிழர்களுக்கு மட்டும்தானா?

இந்த வார பூச்செண்டு

ஹரியானா மாநிலத்தில் நாதுபூர் கிராமத்தில் ஒன்பது வயதுச் சிறுமி மோனாவுக்கு திருமணம் நடத்த பெற்றோர் ஏற்பாடு செய்திருப்பது தெரிந்ததும், அது பற்றி உயர் அதிகாரிகளுக்குத் தகவல் கொடுத்து குழந்தைத் திருமணத்தைத் தடுத்து நிறுத்திய அங்கன்வாடி சூப்பர்வைசர் சீமாகுமாரிக்கு இ.வா.பூச்செண்டு.

இந்த வார குட்டு

சிவாஜியையும் எம்.ஜி.ஆரையும் நையாண்டி செய்து இண்டர்நெட்டில் எழுதியதை திரும்பப் பெறும்வரை எழுத்தாளர் ஜெயமோகனுக்குத் திரையுலகில் பணியாற்ற ஒத்துழைப்புத் தரமாட்டோம் என்று தீர்மானம் போட்டதற்காக நடிகர் சங்கத்துக்கு இ.வா.குட்டு. ஊனமுற்றவர்களை நையாண்டி செய்து காமெடி; பெண்களை இழிவுபடுத்தும் ஆபாச நடனங்கள்; போலீஸ், அரசியல்வாதிகளைக் கேவலப்படுத்தும் காட்சிகள்; என்று ஒட்டு மொத்த சமூகத்தையே இழிவுபடுத்தி திரைப்படங்களை உருவாக்கும் தயாரிப்பாளர்கள், இயக்குநர்கள் ஆகியோருக்கு ஒத்துழைப்புத் தரமாட்டோம் என்று அடுத்தபடி அறிவிக்கும் துணிச்சல் நடிகர், நடிகைளுக்கு உண்டா?

இந்த வார சிரிப்பு

தமிழகத்தில் விரைவில் காங்கிரஸ் ஆட்சி அமைக்கும். மத்திய அமைச்சர் ஈ.வி.கே.எஸ்.இளங்கோவன்.

நன்றி : குமுதம்