Why the pass percentage is better in the Higher Secondary – Plus Two exams

“பாஸ் மார்க்’ நிர்ணயிப்பதில் சாதகமான புதிய விதி: பிளஸ் 2 தேர்ச்சி சதவீதம் அதிகரிப்பு

கடந்த ஆண்டு வரை பிளஸ் 2 தேர்வில் தேர்ச்சிபெற வேண்டுமெனில், குறைந்தபட்சம் செய்முறை (பிராக்டிகல்) தேர்வில் 30 சதவீத மதிப்பெண்களும், கருத்தியல் (தியரி) தேர்வுகளில் 40 சதவீத மதிப்பெண்களும் பெற வேண்டும் என நிர்ணயிக்கப்பட்டிருந்தது.

ஆனால், இந்த ஆண்டு முதல் பிளஸ் 2 தேர்வில் தேர்ச்சி பெற வேண்டுமெனில், குறைந்தபட்சம் செய்முறைத் தேர்வில் 40 சதவீத மதிப்பெண்களும், கருத்தியல் தேர்வுகளில் 30 சதவீத மதிப்பெண்களும் பெற வேண்டும் என்று மாற்றம் செய்யப்பட்டது.

இதேபோல சில தேர்வுகளில் கருணை மதிப்பெண்கள் (கிரேஸ் மதிப்பெண்கள்) வழங்கவும் அரசு உத்தரவிட்டது.

இதன் பயனாக இந்த ஆண்டு பிளஸ் 2 தேர்வில் மாணவ, மாணவிகளின் தேர்ச்சி சதவீதம் 81 சதவீதமாக அதிகரித்துள்ளது. கிராமப்புற பள்ளி மாணவர்களின் தேர்ச்சி சதவீதமும் அதிகரித்துள்ளது.

Dinamani

———————————————————————————–

தூக்கி நிறுத்தும் முயற்சி?

தமிழகத்தில் பிளஸ் 2 பொதுத்தேர்வு முடிவுகளில் 81 சதவீதம் மாணவ, மாணவியர் தேர்ச்சி பெற்றுள்ளனர் என்பது மகிழ்ச்சி அளிப்பதாக இருக்கிறது.

தேர்வு எழுதிய 5,55,965 மாணவ, மாணவியரில் 3,29,091 பேர் 60 சதவீதம் மதிப்பெண் பெற்றுத் தேர்ச்சி பெற்றுள்ளனர் என்பது மேலும் மகிழ்ச்சி தருகிறது.

ஆனால் இந்த தேர்ச்சி விகிதம் அதிகரித்திருப்பதற்குக் காரணம் மாணவர்கள் சிறப்பாகக் கற்றுத் தேர்வு எழுதியதால் அல்ல; தேர்ச்சிக்கான குறைந்தபட்ச மதிப்பெண் மாற்றப்பட்டதுதான் என்ற உண்மை, இந்த மகிழ்ச்சியைக் குறையுடையதாகச் செய்துவிடுகிறது.

பிளஸ் 2 பொதுத் தேர்வில் செய்முறைக்கு 30 மதிப்பெண், கருத்தியல் தேர்வில் 40 மதிப்பெண் குறைந்தபட்சம் பெற வேண்டும் என்ற விதிமுறை இந்த ஆண்டு மாற்றப்பட்டது. மாணவர் தேர்ச்சிக்குக் குறைந்தபட்சமாகக் கருத்தியல் தேர்வில் 30 மதிப்பெண், செய்முறைத் தேர்வில் 40 மதிப்பெண் பெற வேண்டும் என்ற புதிய விதிமுறை ஒரு வரமாக அமைந்துவிட்டது.

அரசுப் பள்ளிகள், அரசு நிதியுதவி பெறும் பள்ளிகள், தனியார் பள்ளிகள் ஆகியவற்றின் சென்ற ஆண்டு தேர்ச்சி விகிதத்தையும், இந்த ஆண்டு தேர்ச்சி விகிதத்தையும் ஒப்பிட்டுப் பார்க்கும்போது, இந்த புதிய முறையால் அதிகம் பயனடைந்துள்ளவை அரசுப் பள்ளிகள்தான் என்பதைக் காண முடிகிறது. அடுத்த நிலையில் அரசு நிதியுதவி பெறும் பள்ளிகள் பயன்பெறுகின்றன. ஆனால் தனியார் பள்ளிகளின் தேர்ச்சி விகிதத்தில் பெரிய மாற்றத்தைக் காண முடியவில்லை.

மாநிலத்தில் 21 ஆண்டுகளாகத் தேர்ச்சி விகிதத்தில் முதன்மை வகிக்கும் விருதுநகர் மாவட்டத்தில், இந்த ஆண்டு தேர்ச்சி விகிதம் 6.5 சதவீதம் அதிகரித்துள்ளது. ஆனால், மிகவும் பின்தங்கிய கல்வி மாவட்டங்களில் ஒன்றான வேலூர் மாவட்ட அரசுப் பள்ளிகளின் தேர்ச்சி விகிதம் 47 சதவீதத்திலிருந்து 65 சதவீதமாக (18 சதவீதம்) உயர்ந்துள்ளது. அரசு உதவிபெறும் பள்ளிகளின் தேர்ச்சி விகிதம் 69 சதவீதத்திலிருந்து 79 சதவீதமாக உயர்ந்துள்ளது, ஆச்சரியம் தரும் மாற்றம்!

வழக்கமாகச் செய்முறைத் தேர்வுக்கான மதிப்பெண்கள் அந்தந்தப் பள்ளி அளவிலேயே தீர்மானிக்கப்படுகின்றன. கருத்தியல் தேர்வு விடைத்தாள்கள் மட்டுமே வேறு இடங்களுக்குக் கொண்டு செல்லப்பட்டு திருத்தப்படுகின்றன. தேர்ச்சிக்குக் குறைந்தபட்சம் 30 மதிப்பெண் பெற்றால் போதும் என்பதாலும், ஒவ்வொரு வினாத்தாளிலும் ஒரு சொல் விடை அல்லது கோடிட்ட இடங்களை நிரப்புதல் போன்ற ஒரு மதிப்பெண் விடைக்கான 30 கேள்விகள் இருப்பதாலும் தேர்ச்சி பெறுவது என்பது மிகவும் எளிதானதாக மாற்றப்பட்டுள்ளது.

ஏற்கெனவே கல்வித் தரம் சரிந்துவருவதாகக் கருத்து நிலவும் இன்றைய வேளையில், மாணவர்கள் எதையும் படிக்காமல் கடைசி நேரத்தில் அதிகபட்சம் 100 ஒரு மதிப்பெண் கேள்விகளை மட்டும் படித்துவிட்டுத் தேர்ச்சி பெற முடியுமெனில், அது பள்ளியின் தேர்ச்சி விகிதம் அதிகரிக்க உதவலாம், ஆனால் அந்த மாணவனின் தனிப்பட்ட வாழ்க்கை நலனுக்கு உதவுமா என்ற கேள்வி எழுகிறது.

கிராமப்புற மாணவர்களின் நலன் கருதி, தமிழகத்தில் தற்போது தொழில் கல்விக்கான நுழைவுத் தேர்வு ரத்து செய்யப்பட்டுள்ளது. மாணவர்கள் பெறும் மதிப்பெண் அடிப்படையில் தொழிற்கல்லூரிகளில் மாணவர் சேர்க்கை நடைபெறவுள்ளது. குறைந்தபட்சம் 90 சதவீத மதிப்பெண் பெற்ற மாணவர்களுக்குத்தான் இத்தகைய கல்லூரிகளில் இடம் கிடைக்கும் வாய்ப்புகள் அதிகம்.

இந்நிலையில், அரசுப் பள்ளிகள், அரசு நிதியுதவி பெறும் பள்ளிகள், தனியார் பள்ளிகளில் 90 சதவீதத்துக்கு அதிகமான மதிப்பெண் பெற்றவர்களின் எண்ணிக்கையை மாவட்டவாரியாகத் தமிழகக் கல்வித் துறை வெளியிடுமானால், இந்தத் தேர்ச்சி விகித உயர்வால் உண்மையான பயன் கிடைத்துள்ளதா என்பதை அலசிப் பார்க்க முடியும்.

———————————————————————————————————————————————-

தமிழகத்தில் சீரான தேர்வுத்தாள் முறை வருகிறது?

சென்னை, நவ. 4: சமச்சீர் கல்வி முறைக்கான அறிக்கை அண்மையில் தமிழக சட்டப் பேரவையில் தாக்கல் செய்யப்பட்டுள்ளது. அதன் தொடர் நடவடிக்கையாக தமிழகத்தில் உள்ள அனைத்து வகை கல்வி முறைக்கும் ஒரே மாதிரியான தேர்வு முறையை அமல்படுத்துவது குறித்து அரசு யோசித்து வருகிறது.

இதன்படி முதல் கட்டமாக மாநிலக் கல்வித் திட்டம், மெட்ரிகுலேஷன், ஆங்கிலோ இந்தியன், ஓரியண்டல் ஆகிய அனைத்து வகை தேர்வு முறைகளிலும் ஒரே சீரான மதிப்பெண் முறையை நடைமுறைப்படுத்துவது குறித்து தமிழக அரசு ஏற்கெனவே அறிவித்துள்ளது.

தற்போது, தேர்வுத் தாள்களில் சீரான நடைமுறையைக் கொண்டு வரலாமா என்பது குறித்தும் யோசனை தெரிவிக்கப்பட்டுள்ளது.

இதன்படி மொழிப் பாடங்களுக்கு இரு தாள்கள், கணிதம், அறிவியல் போன்ற இதர பாடங்களுக்கு ஒரு தாள் கொண்டு வரலாமா என்பது குறித்து யோசனை தெரிவிக்கப்பட்டுள்ளது.

ஆண்டுதோறும் சராசரியாக 7 லட்சத்து 50 ஆயிரம் மாணவர்கள் பத்தாம் வகுப்புத் தேர்வை எழுதுகின்றனர். இவர்களில் மெட்ரிகுலேஷன் தேர்வை சுமார் ஒரு லட்சம் பேரும், ஆங்கிலோ இந்தியன் தேர்வை சுமார் 5 ஆயிரம் பேர், ஓ.எஸ்.எல்.சி. தேர்வை 1,200 பேரும் எழுதுகிறார்கள்.

இவ்வாறு வெவ்வேறு வகையான பாடத் திட்டங்களுக்கு வெவ்வேறு வகையான தேர்வுத் தாள்கள், மதிப்பெண் முறை உள்ளன.

மாநிலக் கல்வித் திட்டத்தின் கீழ் வரும் மாணவர்கள் தமிழில் (அல்லது ஏதாவது மொழிப் பாடம்) இரு தாள்கள், ஆங்கிலத்தில் இரு தாள்கள், கணிதம், அறிவியல், சமூகவியல் என ஐந்து பாடங்களுக்குத் தேர்வு நடத்தப்படும்.

மாணவர்கள் மொத்தம் 7 நாள் தேர்வை எழுத வேண்டும்.

மெட்ரிகுலேஷன் தேர்வு எழுதுவோர் தமிழ் அல்லது ஏதாவது மொழிப் பாடம், ஆங்கிலம், கணிதம் ஆகிய பாடங்களுக்கு இரு தாள்கள் எழுத வேண்டும்.

அது போல் அறிவியலுக்கும் இரு தாள்கள் உண்டு. அறிவியல் முதல் தாள் என்று ஒரு தாளையும், தாவரவியல் – விலங்கியல் கொண்ட அறிவியல் இரண்டாம் தாளையும் எழுதவேண்டும்.

இது தவிர, புவியியல் – பொருளாதாரம் ஒரு தேர்வுத் தாளும், வரலாறு – குடிமையியல் (சிவிக்ஸ்) கொண்ட ஒரு தேர்வுத் தாளும் எழுத வேண்டும்.

மெட்ரிக் தேர்வு எழுதும் மாணவர்கள் 10 நாள்கள் தேர்வை எழுத வேண்டும்.

ஆங்கிலோ இந்தியன் தேர்வில் தமிழ் அல்லது ஏதாவது ஒரு மொழிப் பாடத்துக்கு ஒரே ஒரு தாள்தான் உண்டு. ஆங்கிலத்துக்கு இரு தாள்கள் உள்ளன.

மெட்ரிகுலேஷன் தேர்வைப் போல் கணிதத்துக்கும், அறிவியலுக்கும் தலா இரு தாள்கள் உண்டு. இவை தவிர புவியியல் ஒரு தாள், குடிமையியல் (சிவிக்ஸ்) ஒரு தாள் எழுத வேண்டும். இந்த மாணவர்கள் 9 நாள் தேர்வை எழுத வேண்டும்.

இத்துடன் ஓ.எஸ்.எல்.சி. தேர்வு எழுதுவோர் கூடுதலாக சம்ஸ்கிருதம் அல்லது அரபு மொழிப் பாடத்துக்கான தேர்வை எழுத வேண்டும்.

இவை அனைத்தையும் சீராக்கி, ஆங்கிலத்துக்கு இரு தாள்கள், மொழிப் பாடத்துக்கு இரு தாள்கள், இதர பாடங்களுக்குத் தலா ஒரு தாள் என்று கொண்டு வருவது குறித்து யோசனை அரசுக்குத் தெரிவிக்கப்பட்டுள்ளது.

தற்போது, மாநிலக் கல்வித் திட்ட மாணவர்களின் தேர்வுத் தாள்கள் அனைத்துக்கும் சேர்த்து அதிகபட்சமாக மொத்தம் 500 மதிப்பெண் நிர்ணயிக்கப்பட்டுள்ளது.

இதர தேர்வுகளுக்கு அதிகபட்சமாக 700, 1000 என மதிப்பெண் நிர்ணயிக்கப்பட்டுள்ளது.

இவை அனைத்தையும் சீராக்கி ஒரே மாதிரியாக 500 மதிப்பெண்ணுக்கு என்று நிர்ணயிப்பது குறித்து அரசு பரிசீலித்து வருகிறது.

Zero funds for Thanjavur under Eco-City project: Programme in six cities

“சுற்றுச்சூழல்-நகரம்’ திட்டத்தின் கீழ் தஞ்சாவூர் உள்ளிட்ட 6 நகரங்கள் தேர்வு

புதுதில்லி, மே 16: மத்திய அரசின் சுற்றுச்சூழல்-நகரம் என்ற மேம்பாட்டுத் திட்டத்தின் கீழ் தஞ்சாவூர் உள்ளிட்ட 6 நகரங்கள் தேர்வு செய்யப்பட்டுள்ளன.

சுற்றுச்சூழல் மற்றும் வனத்துறை இணை அமைச்சர் நமோ நாராயண் மீனா, மக்களவையில் கேள்வி ஒன்றுக்கு திங்கள்கிழமை எழுத்து வடிவில் அளித்த பதில்:

1. கோட்டயம் (கேரளம்),
2. புரி (ஒரிசா),
3. திருப்பதி (ஆந்திரப் பிரதேசம்),
4. உஜ்ஜைனி (மத்தியப் பிரதேசம்),
5. பிருந்தாவன் (உத்தரப்பிரதேசம்) மற்றும்
6. தஞ்சாவூர் (தமிழ்நாடு) ஆகிய 6 நகரங்கள் சுற்றுச்சூழல்-நகரம் திட்டத்துக்கு தேர்ந்தெடுக்கப்பட்டுள்ளன.

S. No	Town	Amount released in Lakh of Rupees
1	Kottayam	40.84
2	Puri	55.53
3	Tirupati	49.34
4	Ujjain	67.41
5	Vrindavan	43
6	Thanjavur	Nil

Polls for six Tamil Nadu Rajya Saba seats on June 15

தமிழகத்தைச் சேர்ந்த மாநிலங்களவை உறுப்பினர்கள் 6 பேரின் பதவிக்காலம் ஜூலை 24-ம் தேதி முடிவடைகிறது. இதையடுத்து, அந்த இடங்களுக்கான தேர்தல் ஜூன் 15-ம் தேதி நடைபெறும் என்று தேர்தல் ஆணையம் அறிவித்துள்ளது.

• அதிமுகவைச் சேர்ந்த ஆர். காமராஜ்,
• எஸ். கோகுல இந்திரா,
• எஸ்.எஸ். சந்திரன்,
• பி.ஜி. நாராயணன்,
• திமுகவைச் சேர்ந்த கே.பி.கே. குமரன்,
• காங்கிரஸ் கட்சியைச் சேர்ந்த பி.எஸ். ஞானதேசிகன்

ஆகியோரது பதவிக்காலம் முடிவடைகிறது. சட்டப் பேரவை உறுப்பினர்களின் எண்ணிக்கை அடிப்படையில்,

• அதிமுகவுக்கு இரண்டு உறுப்பினர்கள்,
• காங்கிரசுக்கு ஒரு உறுப்பினர்,
• திமுகவுக்கு மூன்று உறுப்பினர்கள்

தேர்ந்தெடுக்கப்படுவார்கள்.

வேட்பு மனுத்தாக்கல் செய்ய ஜூன் 5 கடைசி நாள்.
வாபஸ் பெற கடைசி நாள் ஜூன் 8.

மாநிலங்களவைத் தேர்தல்: 6 பதவிகளுக்கு வேட்பாளர்கள் யார்?: தமிழக கட்சிகளில் பரபரப்பு

மாநிலங்களவையில் மொத்தம் 229 உறுப்பினர்கள் உள்ளனர். இவர்களில் 18 பேர் தமிழகத்தில் இருந்து தேர்ந்தெடுக்கப்பட்டு இடம் பெற்றுள்ளனர்.

கட்சிகளின் பலம்:
தற்போது பேரவையில் உள்ள 234 உறுப்பினர்களில் கட்சி வாரியாக பலம்:

• தி.மு.க. – 95;
• அ.தி.மு.க. – 61;
• காங்கிரஸ் – 34;
• பா.ம.க. – 18;
• மார்க்சிஸ்ட் – 9;
• இந்திய கம்யூனிஸ்ட் – 6;
• ம.தி.மு.க. – 6;
• விடுதலைச் சிறுத்தைகள் – 2;
• தே.மு.தி.க. -1;
• சுயேச்சை 1;
• நியமன உறுப்பினர் 1;
• பேரவைத் தலைவர் -1.

(மதுரை மேற்குத் தொகுதி அ.தி.மு.க. உறுப்பினர் எஸ்.வி. சண்முகம் காலமானதால், அத்தொகுதி காலியாக உள்ளது.)

காங்கிரஸில் கிடைக்கக் கூடிய ஓர் இடத்தில் அக்கட்சியின் சார்பில் மீண்டும் போட்டியிட

• பி.எஸ். ஞானதேசிகனே நிறுத்தப்படலாம்.
• அல்லது ஜி.கே. மூப்பனாரின் சகோதரர் ஜி.ஆர். மூப்பனார்,
• முன்னாள் மத்திய அமைச்சர்கள் எஸ்.ஆர். பாலசுப்பிரமணியன்,
• ஜெயந்தி நடராஜன்,
• தமிழ்நாடு காங்கிரஸ் தலைவர் எம். கிருஷ்ணசாமி போன்றவர்களில் யாராவது ஒருவருக்கு வாய்ப்புத் தரப்படலாம் என அக்கட்சி வட்டாரங்கள் தெரிவித்தன.
• மத்திய பாதுகாப்புத் துறை அமைச்சர் ஏ.கே. அந்தோனியின் மாநிலங்களவை உறுப்பினர் பதவிக் காலம் விரைவில் முடிய உள்ளது. எனவே, அவருக்கோ,
• தமிழக காங்கிரஸ் பொறுப்பாளர் வீரப்ப மொய்லிக்கோ

கூட இந்த இடத்தை காங்கிரஸ் மேலிடம் அளிக்கலாம்.

தி.மு.க.வைப் பொருத்தவரை, தனக்குக் கிடைக்கும் 3 இடங்களில் ஒன்றை இந்திய கம்யூனிஸ்ட் கட்சியின் மூத்த தலைவர் ஆர். நல்லகண்ணு அல்லது அக்கட்சியைச் சேர்ந்த ஒருவருக்கு விட்டுத் தர எண்ணி உள்ளது.

எஞ்சிய 2 இடங்களில்

• அழகிரி அல்லது அவர் சுட்டிக் காட்டும் நபர்,
• கனிமொழி,
• டி.கே.எஸ். இளங்கோவன்,
• திருச்சி சிவா,
• டாக்டர் கே.பி. ராமலிங்கம்,
• தில்லியில் உள்ள தமிழக அரசின் சிறப்புப் பிரதிநிதி கம்பம் செல்வேந்திரன்,
• முன்னாள் அமைச்சர்கள் அ. ரகுமான்கான்,
• எஸ்.பி. சற்குணபாண்டியன்,
• இந்திரகுமாரி,
• கோவை மு. ராமநாதன்,
• சட்டப் பேரவை முன்னாள் உறுப்பினர்கள் சரவணன்,
• புகழேந்தி,
• ஜெ. அன்பழகன்,
• தற்போது மாநிலங்களவை உறுப்பினர் பதவிக் காலம் முடிபவர்களில் ஒருவரான கே.பி.கே. குமரன்

போன்றவர்களில் யாராவது இருவருக்கு வாய்ப்புத் தரப்படலாம்.

அ.தி.மு.க.வைப் பொருத்தவரை

• சசிகலா அல்லது அவர் சுட்டிக் காட்டும் ஒருவர்,
• கட்சியின் அவைத் தலைவர் இ. மதுசூதனன்,
• முன்னாள் அமைச்சர்கள் டி.எம். செல்வகணபதி,
• எஸ். முத்துசாமி,
• நயினார் நாகேந்திரன்,
• தளவாய் சுந்தரம்,
• கட்சி நிர்வாகி ஆதிராஜாராம்

உள்ளிட்டோரில் யாராவது இருவர் நிறுத்தப்படலாம் என அக்கட்சி வட்டாரங்கள் கூறின.

====================================================
காங்கிரஸில் மீண்டும் கோஷ்டிப் பூசல்

பா. ஜெகதீசன்

சென்னை, மே 17: கடலில் அலைகள் ஓயாது; அதைப் போல, தமிழ்நாடு காங்கிரஸில் கோஷ்டிப்பூசல் தீரவே தீராது.

இதை மீண்டும் நிரூபிக்கும் வகையில், தற்போதைய மாநிலங்களவைத் தேர்தல் அறிவிப்பு காங்கிரஸில் பிரச்சினையை ஏற்படுத்தி உள்ளது என அக்கட்சி வட்டாரங்கள் தெரிவித்தன.

இத்தேர்தலில் காங்கிரஸýக்குக் கிடைக்கக் கூடிய ஒரே ஓர் இடத்தில் யாரை வேட்பாளராக நிறுத்துவது என்பதில் அக்கட்சியினர் இரு அணிகளாகப் பிளவுபட்டு நிற்கின்றனர்.

பழைய த.மா.கா. அணியினரில் யார் நிறுத்தப்பட்டாலும், அவர்களை எதிர்ப்போம் என்று “தொடர்ந்து காங்கிரஸிலேயே இருந்து வரும் அணி’யைச் சேர்ந்தவர்கள் போர்க்கொடி தூக்கி உள்ளனர்.

தங்களது எதிர் அணியைச் சேர்ந்தவர்கள் நிறுத்தப்பட்டால், தாங்கள் எதிர்க்கப் போவதாக பழைய த.மா.கா. அணியினர் பதிலுக்குக் கூறி உள்ளனர்.

தமிழகத்தில் இருந்து மாநிலங்களவைக்கு 6 பேரைத் தேர்ந்தெடுக்க ஜூன் 15-ல் தேர்தல் நடைபெறும் என அறிவிக்கப்பட்டுள்ளது. சட்டப் பேரவை உறுப்பினர்கள் வாக்களித்து இந்த 6 பேரைத் தேர்ந்தெடுப்பார்கள்.

தற்போது பேரவையில் காங்கிரஸýக்கு உள்ள பலத்தின் அடிப்படையில் நிச்சயம் ஒரு பதவி அக்கட்சிக்கு கிடைக்கும்.

வாய்ப்பு கேட்பவர்கள்: அந்த இடத்தில் மீண்டும் போட்டியிட தற்போது மாநிலங்களவை உறுப்பினர் பதவிக் காலம் முடியும் நிலையில் உள்ள பி.எஸ். ஞானதேசிகனுக்கே வாய்ப்பு தர வேண்டும் என்று பழைய த.மா.கா.வினர் கட்சி மேலிடத்திடம் கேட்டுள்ளனர்.

ஜி.கே. மூப்பனாரின் சகோதரர் ஜி.ரங்கசாமி மூப்பனார், சட்டப் பேரவை முன்னாள் எதிர்க்கட்சித் தலைவர் எஸ்.ஆர். பாலசுப்பிரமணியன் போன்றவர்களுக்கு வாய்ப்பு தரப்பட வேண்டும் எனவும் கோரப்பட்டுள்ளது.

முன்னாள் மத்திய அமைச்சர் ஜெயந்தி நடராஜனை இத்தேர்தலில் நிறுத்த வேண்டும் என்று கட்சியின் ஒரு பிரிவினர் மேலிடத்திடம் கேட்டுள்ளனர்.

தமிழ்நாடு காங்கிரஸ் தலைவர் எம். கிருஷ்ணசாமிக்கு இப்பதவி தரப்பட வேண்டும் என அவரது ஆதரவாளர்கள் கோரியுள்ளனர்.

இரு அணிகளின் மோதல்: ஏற்கெனவே, சட்டப் பேரவையில் பேரவை காங்கிரஸ் கட்சித் தலைவர் டி. சுதர்சனத்தின் தலைமையில் பழைய த.மா.கா.வினரும், மூத்த நிர்வாகி போளூர் வரதனின் தலைமையில் “தொடர்ந்து காங்கிரஸிலேயே இருந்து வருபவர்களும்’ இரு அணிகளாகப் பிரிந்து நின்று, ஒருவருக்கு ஒருவர் கடும் எதிர்ப்பைத் தெரிவித்து வருகின்றனர். பேரவையின் பட்ஜெட் தொடர் கூட்டம் நிறைவடைந்த திங்கள்கிழமை கூட இரு அணியினரும் மோதிக் கொண்டனர். பேரவைக் குழுக்களுக்கு உறுப்பினர்களை நியமிப்பது தொடர்பாக சுதர்சனம் எடுத்த நிலையை வரதன் எதிர்த்தார். வரதனுக்கும், அவரது ஆதரவாளர்களுக்கும் சில விளக்கங்களை சுதர்சனம் அளித்தார்.

இறுதியில் தமது எதிர்ப்பை வெளிப்படுத்தும் கடிதத்தை சுதர்சனத்திடம் வரதன் அளித்தார். அக்கடிதத்தில் 16 எம்.எல்.ஏ.க்கள் கையெழுத்திட்டுள்ளதாக காங்கிரஸ் வட்டாரங்கள் தெரிவித்தன.

மாநிலங்களவை உறுப்பினர் பதவிக்கு எக்காரணம் கொண்டும் பழைய த.மா.கா.வினரை நிறுத்தக் கூடாது என்பதைக் கட்சியின் அகில இந்திய மேலிடத்திடம் வலியுறுத்துவோம். அதற்கான நடவடிக்கைகளைத் தொடங்கி விட்டோம். விரைவில் மேலிடத்தைச் சந்திப்போம் என்று “தொடர்ந்து காங்கிரஸிலேயே இருந்து வரும் அணி’யினர் தெரிவித்தனர்.
==========================================================
மாநிலங்களவை இந்திய கம்யூ. வேட்பாளர் து.ராஜா?

கோவை, மே 17: மாநிலங்களவைத் தேர்தலில் திமுக கூட்டணியில் இந்திய கம்யூனிஸ்ட் கட்சிக்கு ஒதுக்கப்படும் ஓர் இடத்தில் அக்கட்சியின் தேசியச் செயலர் து.ராஜா (50) நிறுத்தப்பட உள்ளார் என அக்கட்சி வட்டாரங்கள் தெரிவிக்கின்றன.

கடந்த பொதுத் தேர்தலின்போது நாகப்பட்டினம் தொகுதியை இவருக்காக இந்திய கம்யூனிஸ்ட் கட்சி கேட்டது. திமுக வெற்றி பெற்ற தொகுதி என்பதால், திமுக தக்கவைத்துக் கொண்டது. இதனால், போட்டியிடும் வாய்ப்பு ராஜாவுக்குக் கடந்த முறை கிடைக்கவில்லை.

சட்டப் பேரவைத் தேர்தலில் மார்க்சிஸ்ட் கம்யூனிஸ்ட் கட்சிக்கு இந்திய கம்யூனிஸ்ட் கட்சியை விடக் கூடுதல் தொகுதிகள் திமுக கூட்டணியில் ஒதுக்கப்பட்டன. இதனால், இந்திய கம்யூனிஸ்ட் கட்சிக்கு ஏற்பட்ட மன வருத்தத்தைப் போக்க, மாநிலங்களவையில் காலியாகும் இடத்தில் ஒன்றை இந்திய கம்யூனிஸ்ட் கட்சிக்கு ஒதுக்க திமுக முன்வந்தது. இந்நிலையில், அக் கட்சியின் தேசியச் செயலர் ராஜா வேட்பாளராக நிறுத்தப்படுவார் எனத் தெரிகிறது. ராஜாவுக்கு பாட்டாளி மக்கள் கட்சியும் ஆதரவு தெரிவித்துள்ளது.

கட்சியில் அகில இந்தியப் பொதுச்செயலர் ஏ.பி.பரதனுக்கு அடுத்த நிலையில் உள்ளவர் ராஜா. காங்கிரஸ் தலைவர் சோனியா, பிரதமர் மன்மோகன் மற்றும் தோழமைக் கட்சித் தலைவர்களுடன் நெருக்கமான தொடர்பு கொண்டிருப்பவர்.

தமிழகத்தைச் சேர்ந்த ராஜா தேசிய அரசியலில் இருப்பதால், அவரை கட்சியின் சார்பில் நாடாளுமன்றத்துக்கு அனுப்புவது அவசியம் எனவும் இந்திய கம்யூனிஸ்ட் கட்சியில் கருத்து நிலவுகிறது.

கட்சியினர் விரும்பிக் கேட்டுக் கொண்டபோதும் வயது, உடல்நிலையைக் கருத்தில்கொண்டு கடந்த பொதுத் தேர்தலில் போட்டியிட ஆர்.நல்லகண்ணு ஒப்புக் கொள்ளவில்லை. இளைஞர்களுக்கு வழிவிட வேண்டும் என அவர் தெரிவித்ததால், கே.சுப்பராயன் கோவை மக்களவைத் தொகுதியில் நிறுத்தப்பட்டார்.

தமிழக வரலாற்றில் கல்யாணசுந்தரத்துக்குப் பின் இந்திய கம்யூனிஸ்ட் கட்சியைச் சேர்ந்தவர் மாநிலங்களவைக்கு தேர்ந்தெடுக்கப்படவில்லை என்பது குறிப்பிடத்தக்கது.

Rajini admires Thankar Bachan story – May act in his movie?

மனோரமா, பாரதிராஜா, வேலுபிரபாகரன் வரிசையில் இப்போது ‘குருவி குடைஞ்சா கொய்யாப்பழம்’ புகழ் தங்கர்பச்சான்! ஏதோ கலைமாமணி விருது பெறப்போகிறவர்களின் லிஸ்ட் அல்ல. ரஜினியை திட்டிவிட்டு பின்னர் தடாலென்று புகழ்ந்து தள்ளுபவர்களின் லிஸ்ட்தான்.

விஷயம் இதுதான். தங்கர்பச்சான் ‘ஒன்பது ரூபாய் நோட்டு’ கதையை படமாக்க ரஜினியிடம் கால்ஷீட் கேட்டாராம். கதையைக் கேட்டுவிட்டு ரஜினியும் தங்கரை பாராட்டியிருக்கிறார்.

குஷியான தங்கரும், ரஜினி போல ஒரு இயல்பான நடிகர் யாரும் கிடையாது. அவருடைய வயதுக்கும், அவருடைய நடிப்புக்கும் இந்தக் கதையில் நடித்தால் அவரை உலகத்தரத்துக்கு கொண்டு செல்லமுடியும் என்று சொல்லித் திரிகிறாராம். ‘எடுத்தது மூணு படம்…அதுல ஊத்திக்கிட்டது ரெண்டு படம்… இதுல பேச்சுக்கு மட்டும் குறைச்சலேயில்லை’ என்று முணுமுணுக்கிறது ரசிகர்கள் வட்டாரம்.

60,000 Indian IT professionals in US return home

இந்தியாவில் பொருளாதார, ஐ.டி. தொழில் வளர்ச்சியால் அமெரிக்காவில் இருந்து திரும்பிய 60 ஆயிரம் பேர்

நியூயார்க், மே 15: பொருளாதார மற்றும் தகவல் தொழில்நுட்பத் துறை வளர்ச்சியால் அமெரிக்காவில் இருந்து சுமார் 60 ஆயிரம் பேர் அண்மையில் இந்தியா திரும்பியுள்ளதாக தெரிய வந்துள்ளது.

இருப்பினும் அமெரிக்காவின் கலிபோர்னியா மாகாணத்தில் தகவல் தொழில்நுட்ப நிறுவனங்கள் நிறைந்த சிலிக்கான்வேலி எந்த வகையிலும் பாதிக்கப்படவில்லை, தாயகம் திரும்புவோர் இந்தியாவில் சொந்தமாக தொழில் தொடங்குவதாகவும் அமெரிக்க ஊடகம் தெரிவித்துள்ளது.

இது குறித்து தாயகம் திரும்பியோருக்கான அமைப்பின் உறுப்பினர் மிஸ்ரா கூறுகையில், 2003-ம் ஆண்டு இந்தியா திரும்பியோரின் எண்ணிக்கை 15 ஆயிரமாக இருந்தது, அதன்பின்னர் 4 ஆண்டுகளில் சுமார் 40 ஆயிரம் பேர் தாயகம் திரும்பியுள்ளனர் என்றார்.

இந்தியாவில் அன்னிய முதலீடு அதிகரித்துக் கொண்டே இருப்பதால் சிலிக்கான்வேலியில் உள்ள ஏராளமான நிறுவனங்கள் இந்தியாவின் மீது தங்களது கவனத்தை திருப்பியுள்ளன என்றார்.

சிலிக்கான்வேலியில் “கிளியர்ஸ்டோன்’ என்ற அவரது நிறுவனத்திற்கு மும்பையிலும் கிளை உள்ளது.

இதனிடையே, அன்னா லீ மற்றும் பெர்கிலி ஆகிய இரு பல்கலைக்கழக மாணவர்கள் மேற்கொண்ட ஆய்வில், சிலிக்கான்வேலியில் உள்ள 15 சதவீத நிறுவனங்களை ஆரம்பித்தவர்கள் இந்தியர்கள் என்று தெரிவிக்கப்பட்டுள்ளது.

மேலும் சிலிக்கான் வேலியில் அறிவியல் மற்றும் பொறியியல் பணிகளில் ஈடுபட்டுள்ளவர்களில் 53 சதவீதம் பேர் வெளிநாட்டைச் சேர்ந்தவர்கள்.

கடந்த 10 ஆண்டுகளில் அமெரிக்காவில் ஆரம்பிக்கப்பட்ட அறிவியல் மற்றும் பொறியியல் நிறுவனங்களில் 25 சதவீதத்தை ஆரம்பித்தவர்கள் இந்தியர்கள் என்றும் அம் மாணவர்கள் தங்களது ஆய்வறிக்கையில் கூறியுள்ளனர்.

இந்தியர்களால் ஆரம்பிக்கப்பட்ட நிறுவனங்கள் சுமார் ரூ. 34440 கோடி அளவுக்கு வர்த்தகம் செய்துள்ளன. 4 லட்சத்து 50 ஆயிரம் வேலைவாய்ப்புகளை உருவாக்கியுள்ளன என்றும் அதில் கூறப்பட்டுள்ளது.

இதனிடையே “மெர்குரி நியூஸ்’ வெளியிட்டுள்ள செய்தியில், இந்தியாவில் கிளைகள் திறக்காமல் அமெரிக்காவில் எந்த பெரிய தகவல் தொழில்நுட்ப நிறுவனமும் செயல்பட முடியாது என்று குறிப்பிட்டுள்ளது.

மேலும், 2015-ம் ஆண்டு வரை அமெரிக்காவின் அவுட்சோர்சிங் பெறுவதில் இந்தியா முதலிடத்தில் இருக்கும் என்றும் கூறியுள்ளது.

அதற்கு பல்வேறு காரணங்களையும் தெரிவித்துள்ளது. அதாவது இந்திய மக்கள் தொகையில் 50 சதவீதத்தினர் 25 வயதிற்குள்பட்டவர்கள். குறைந்த ஊதியத்தில் திறமையாகப் பணியாற்றக் கூடியவர்கள் என்றும் கூறப்பட்டுள்ளது.

“இன்டல் இந்தியா’ நிறுவனத்தின் அமர்பாபு என்பவர் கூறுகையில், ஆராய்ச்சி -வளர்ச்சிப் பணி மற்றும் தகவல் தொழில்நுட்பப் பயன்பாட்டில் முதலிடத்தில் உள்ளதால் இந்தியச் சந்தையின் எதிர்காலம் சிறப்பாக உள்ளது என்றார்.